కేవలం 21 రోజుల్లో 50 లక్షల మందికి వ్యాక్సిన్.. భారత్ నయా రికార్డు

ప్రపంచంలోనే అతిపెద్ద వ్యాక్సినేషన్ ప్రక్రియ భారత్‌లో వడివడిగా సాగుతోంది. శుక్రవారం (ఫిబ్రవరి 5) నాటికి వ్యాక్సిన్ తీసుకున్న వారి సంఖ్య 50 లక్షల మార్కును దాటింది. శుక్రవారం సాయంత్రం 6 గంటల వరకు ఉన్న వివరాల ప్రకారం దేశవ్యాప్తంగా 52,90,474 మందికి కరోనా వ్యాక్సిన్ వేసినట్లు కేంద్ర ఆరోగ్య శాఖ తెలిపింది. కేవలం 21 రోజుల్లోనే 50 లక్షల మార్క్‌ను అందుకున్నట్లు వివరించింది. దీంతో భారత్ మరో ఘనత సాధించింది.

50 లక్షల మందికి వ్యాక్సిన్‌ను వేయడానికి అమెరికాలో 24 రోజులు, యూకేలో 43 రోజులు, ఇజ్రాయెల్‌లో 45 రోజుల సమయం పట్టిందని కేంద్ర ఆరోగ్య శాఖ అదనపు కార్యదర్శి మనోహర్ అగ్నాని తెలిపారు. వ్యాక్సినేషన్‌కు సంబంధించిన కీలక వివరాలను మీడియాకు వెల్లడించారు.