దేశ సరిహద్దులు దాటిన జస్టిస్ కర్ణన్!

కోర్టు ధిక్కరణ కేసులో ఆరు నెలల శిక్ష పడిన కలకత్తా హైకోర్టు న్యాయమూర్తి జస్టిస్ కర్ణన్ అరెస్టును తప్పుంచుకునేందుకు దేశ సరిహద్దులు దాటి నేపాల్ కానీ, బంగ్లాదేశ్ కానీ వెళ్లినట్లు తెలుస్తోంది. ఇదే విషయాన్ని ఆయన న్యాయసలహాదారు ధృవీకరించారు. కర్ణన్ ను అరెస్టు నుంచి తప్పించాలని ఆయన న్యాయ సలహాదారులు రాష్ట్రపతిని కలవాలని నిర్ణయించారు. ఈ కేసులో రాష్ట్రపతి జోక్యం చేసుకోవాలని కోరనున్నారు.

‘జస్టిస్ కర్ణన్ విషయంలో రాష్ట్రపతి జోక్యం చేసుకోవాలని కోరుతున్నాం’ అని మద్రాస్ హైకోర్టు న్యాయవాది డబ్య్లు పీటర్ రమేష్ కుమార్ అన్నారు.
‘మేం తర్వాతి లీగల్ ఫైటింగ్ కోసం సిద్ధమవుతున్నాం. అప్పటి వరకు కర్ణన్ అజ్ఞాతంలో ఉండాల్సిన అవసరం ఉందని’ ఆయన పేర్కొన్నారు.

అయితే కర్ణన్ సరిగ్గా ఏదేశంలో ఉన్నారు? ఏప్రాంతంలో ఉన్నారనే విషయంపై రమేష్ స్పష్టత ఇవ్వలేదు.

జస్టిస్ కర్ణన్ కు విధించిన కేసు, అరెస్టుపై పునర్విచారణ జరపాలని ఆయన తరఫున న్యాయనిపుణులు సుప్రీంకోర్టులో పిటిషన్ దాఖలు చేశారు.

సుప్రీంకోర్టు చీఫ్ జస్టిస్ జెఎస్ ఖెహర్ సహా మరో ఆరుగురు న్యాయమూర్తులను ఎస్సీ,ఎస్టీ చట్టం కింద అరెస్టు చేయాలని జస్టిస్ కర్ణన్ ఆదేశాలు జారీ చేసిన నేపథ్యంలో..సర్వోన్నత న్యాయస్థానం ఆయనకు ఆరు నెలల జైలు శిక్ష విధిస్తూ కలకత్తా పోలీసులను మంగళవారం ఆదేశాలు జారీచేసింది.

కర్ణన్ ను అరెస్టు చేసేందుకు కలకత్తా పోలీసులు బుధవారం తమిళనాడు, ఆంధ్రప్రదేశ్ లలో గాలించినా.. ఆయన జాడ లభించలేదు.