నిర్భయ కేసు విచారణ.. సొమ్మసిల్లిన సుప్రీం జడ్జి

నిర్భయ కేసులో దోషులుగా తేలిన నలుగురు ఉరిశిక్షను రకరకాల ప్రయత్నాలు చేస్తున్నారు. తమ ఎదుట ఉన్న అన్ని న్యాయపరమైన మార్గాలను ఉపయోగించుకుంటున్నారు. నిర్భయ దోషులను ఉరిపై ట్రయల్ కోర్టు స్టే ఇవ్వగా.. హైకోర్టు దాన్ని సమర్థించిన సంగతి తెలిసిందే. హైకోర్టు తీర్పును సవాల్ చేస్తూ.. కేంద్రం సుప్రీం కోర్టు మెట్లెక్కింది. కేంద్రం దాఖలు చేసిన పిటిషన్‌ విచారణ జరుగుతున్న సమయంలో జస్టిస్ ఆర్.భానుమతి సొమ్మసిల్లి పడిపోయారు.

దీంతో భద్రతా సిబ్బంది ఆమెను కోర్టు రూం నుంచి బయటకు తీసుకెళ్లి వైద్య సాయం అందించారు. అనంతరం స్పృహలోకి వచ్చిన ఆమెను తిరిగి ఛాంబర్‌లోకి తీసుకొచ్చారు. జడ్జి సొమ్మసిల్లి పడిపోవడంతో కేసును వాయిదా వేశారు.

మరోవైపు తన క్షమాభిక్ష పిటిషన్‌ను రాష్ట్రపతి తిరస్కరించడాన్ని సవాల్ చేస్తూ వినయ్ శర్మ సుప్రీం కోర్టులో పిటిషన్ దాఖలు చేసిన సంగతి తెలిసిందే. ఈ పిటిషన్‌ను విచారించిన అత్యున్నత న్యాయస్థానం వినయ్ శర్మ అభ్యర్థనను తిరస్కరించింది. అతడు మానసికంగా ఇబ్బందులను ఎదుర్కొంటున్నాడన్న వాదనతో న్యాయస్థానం విభేదించింది.