ప్రజాధనంతో ఎమ్మెల్యేలకు బంగారు బిస్కెట్లు!

ప్రజాధనంతో పండగ చేసుకోవడానికి సందర్భాలను వెతుకుతూ ఉన్నట్టున్నారు ప్రజాప్రతినిధులు. ఇప్పటికే దేశంలోని చాలా రాష్ట్రాల్లో ఎమ్మెల్యేలు వివిధ సందర్భాల్లో ఖరీదైన గిఫ్టులు అందుకుంటున్నారు. ఐఫోన్లు, ఐ పాడ్‌లు గట్రా తీసుకుంటున్నారు. అసెంబ్లీ సమావేశాలు ముగిసిన సందర్భాల్లోనో, మరో సమయంలోనో.. ఏదోలా వీరి కానుకలకు కోట్ల రూపాయల ప్రజాధనాన్ని ఖర్చు చేస్తున్నారు. ఇలాంటి నేపథ్యంలో కర్ణాటక రాజకీయ నేతలు మరో అడుగు ముందుకు వేశారు. ఒక్కో ఎమ్మెల్యేకు ఒక్కో బంగారు బిస్కెట్.. అనే కార్యక్రమాన్ని చేపట్టాలని కర్ణాటక శాసనసభ స్పీకర్ ప్రతిపాదించారు. ఈ వ్యవహారం తీవ్ర వివాదాస్పదంగా మారుతోంది.

కర్ణాటక అసెంబ్లీ భవనం అరవై సంవత్సరాలను పూర్తి చేసుకున్న నేపథ్యంలో ప్రస్తుత శాసనసభ సభ్యులకు, శాసనమండలి సభ్యులకు తలా ఒక బంగారు బిస్కెట్ ఇవ్వాలని స్పీకర్ కొలివాద ప్రతిపాదించారు. మొత్తం మూడు వందల మంది ఎమ్మెల్యేలు-ఎమ్మెల్సీలకు ఈ బంగారు బిస్కెట్లు అందేలా చూడాలని ఆయన ప్రభుత్వాన్ని కోరారు. దీనికి గానూ మూడు కోట్ల రూపాయలు ఖర్చు అవుతుందని అంచనా. అదేమంటే.. అసెంబ్లీ భవనానికి అరవై సంవత్సరాలు పూర్తి అయిన నేపథ్యం అని అంటున్నారు. మరి ఆ భవనానికి, ప్రజాప్రతినిధులకు ఇలాంటి కానుకలు ఇవ్వడానికి సంబంధం ఏముంది? అనేది ప్రశ్న.

ఈ నేపథ్యంలో.. స్పీకర్ ప్రతిపాదన వివాదాస్పదంగా మారింది. అంత ఖర్చు చేసి ప్రజాప్రతినిధులకు కానుకలు ఎందుకు అనే ప్రశ్నలు ఉత్పన్నం కావడంతో సర్కారు ఆత్మరక్షణలో పడుతోంది. ఒకవైపు రైతులకు సంబంధించి, ప్రజలకు సంబంధించి బోలెడన్ని సమస్యలున్నాయి. వాటిని పరిష్కరించడానికి నిధుల లేమి అంటారు. అదే సమయంలో ఇలాంగి కానుకలు ఏమిటని సోషల్ మీడియాలో అనేక మంది కన్నడీగులు ప్రశ్నిస్తున్నారు.

దీంతో స్పీకర్ మళ్లీ వివరణ ఇచ్చుకున్నారు. అది కేవలం ప్రతిపాదన మాత్రమే అని, సీఎం ఆ వ్యవహారంపై నిర్ణయం తీసుకోలేదని, కానుకల పంపకం ఏమీ ఉండదు.. అని ఆయన వ్యాఖ్యానించారు.