కర్ణాటక బైపోల్స్: పోలింగ్ ప్రారంభం.. అక్కడ సీఎం భార్య గెలుపు లాంఛనమే!

కర్ణాటకలోని మూడు లోక్‌సభ, రెండు అసెంబ్లీ స్థానాలకు ఉప ఎన్నికల పోలింగ్‌ ప్రక్రియ శనివారం ఉదయం ప్రారంభమైంది. బళ్లారి, శివమొగ్గ, మాండ్య లోక్‌సభ స్థానాలతోపాటు రామనగర, జమఖండి అసెంబ్లీ నియోజకవర్గాలకు ఉప ఎన్నిక జరుగుతోంది. ఈ నియోజకవర్గాల్లోని ఓటింగ్ కోసం 6,450 పోలింగ్‌ కేంద్రాలను ఏర్పాటు చేశారు. మొత్తం 54,54,275 మంది ఓటర్లు తమ ఓటు హక్కును వినియోగించుకోనున్నారు. సాయంత్రం 6 గంటల వరకు పోలింగ్‌ జరగనుంది. ఓట్ల లెక్కింపు ఈ నెల 6న చేపట్టనున్నారు. అన్ని స్థానాల్లోనూ కాంగ్రెస్-జేడీఎస్ కూటమి ఉమ్మడి అభ్యర్థులను బరిలోకి దింపింది. మాండ్య, శివమొగ్గ పార్లమెంటు, రామనగర అసెంబ్లీ స్థానంలో జేడీఎస్, బళ్లారి ఎంపీ, జమఖండి అసెంబ్లీ స్థానాల్లో కాంగ్రెస్ అభ్యర్థులు పోటీలో ఉన్నారు.

బళ్లారి పార్లమెంటు స్థానం నుంచి ప్రాతినిధ్యం వహించిన బీజేపీ నేత శ్రీరాములు, గత శాసనసభ ఎన్నికల్లో ఎమ్మెల్యేగా విజయం సాధించడంతో ఎంపీ పదవికి రాజీనామా చేశారు. దీంతో ఇక్కడ ఉప-ఎన్నిక అనివార్యమైంది. రామనగర్‌ బీజేపీ అభ్యర్థి పోటీ నుంచి వైదొలగడంతో జేడీఎస్‌ అభ్యర్థి, ముఖ్యమంత్రి కుమారస్వామి భార్య అనితా కుమారస్వామి గెలుపు లాంఛనమే. ఈ స్థానం నుంచి బరిలో నిలిచిన బీజేపీ అభ్యర్థి ఎల్ చంద్రశేఖర్ రెండు రోజుల కిందట బీజేపీని వీడి కాంగ్రెస్‌లో చేరారు.

జమఖండిలో పోటీ కూడా సాధారణంగా ఉంది. శివమొగ్గకు భారీగా పోలీసులను తరలించగా.. బళ్లారిలో ఆంధ్రప్రదేశ్‌ నుంచి ఎవరూ ప్రవేశించకుండా చెక్‌పోస్టులు ఏర్పాటుచేశారు. కాగా.. రామనగర్‌లో ఎన్నికలను వాయిదా వేయాలని రాష్ట్ర బీజేపీ నేతలు ఎన్నికల కమిషనర్‌ను కోరారు. తమ అభ్యర్థి చంద్రశేఖర్‌ను ప్రలోభపెట్టి పోటీ నుంచి ఉపసంహరింపచేశారని వారు ఆరోపించారు. ఆ స్థానంలో ఎన్నిక ఏకపక్షంగా మారిందని, వాయిదా వేయాలని వారు తమ ఫిర్యాదులో పేర్కొన్నారు. కాంగ్రెస్-జేడీఎస్ ప్రభుత్వం ఏర్పడిన ఆరు నెలల తర్వాత జరుగుతోన్న ఈ ఉప-ఎన్నికలను అధికార కూటమి గెలుపు తథ్యమని అందరూ భావిస్తున్నారు.