కన్నడ రాజకీయాలు క్లైమాక్స్‌కు.. సీఎం కుమారస్వామి రాజీనామా చేస్తారా?

కర్ణాటక అసెంబ్లీలో నాటకీయ పరిణామాలు కొనసాగుతున్నాయి. సీఎం కుమారస్వామి ప్రవేశపెట్టిన విశ్వాస పరీక్ష అంశంపై సోమవారం (జులై 22) కూడా చర్చ కొనసాగింది. అసెంబ్లీలో బల పరీక్షపై సోమవారం రాత్రి ఓటింగ్‌ జరుగుతుందని భావిస్తుండగా.. అంతకుముందే జేడీఎస్‌-కాంగ్రెస్‌ సంకీర్ణ సర్కార్‌ సారథి, సీఎం కుమారస్వామి తన పదవికి రాజీనామా చేసే అవకాశాలు కనిపిస్తున్నాయి. ఆయన ఇప్పటికే గవర్నర్ వాజుభాయ్ వాలా అపాయింట్‌మెంట్ కోరారు. ఇది ఆయన రాజీనామా చేస్తున్నట్లు వస్తున్న వార్తలకు మరింత ఊతమిస్తోంది.

రెబల్‌ ఎమ్మెల్యేలను తిరిగి సంకీర్ణ శిబిరానికి చేర్చేందుకు జేడీఎస్‌-కాంగ్రెస్‌ కూటమి గత రెండు రోజులుగా విశ్వ ప్రయత్నాలు చేసింది. అవసరమైతే ముఖ్యమంత్రి పీఠంపై మరో వ్యక్తిని కూర్చోబెట్టడానికి కూడా సిద్ధమని ప్రకటించారు. కానీ, రెబల్ ఎమ్మెల్యేలు ఏమాత్రం వెనక్కి తగ్గలేదు.

మరోవైపు కాంగ్రెస్‌, బీజేపీ నేతల మధ్య మాటల యుద్ధం కొనసాగుతోంది. కుమారస్వామి ప్రభుత్వాన్ని కూలదోసేందుకు బీజేపీ కుట్రపన్నిందని మంత్రి కృష్ణ బైరెడ ఆరోపించారు. కన్నడనాట ‘ఆపరేషన్‌ కమలం’ అమలు చేస్తున్నారని మండిపడ్డారు. మంత్రి ఆరోపణలను కర్ణాటక బీజేపీ అధ్యక్షుడు యడ్యూరప్ప ఖండించారు. సంకీర్ణ సర్కార్‌లో కలహాలే సంక్షోభానికి కారణమని ఆయన వ్యాఖ్యానించారు. మైనారిటీలో పడిన సంకీర్ణ సర్కార్‌ బలనిరూపణ చేసుకోవాలని డిమాండ్‌ చేశారు.

తమ ప్రయత్నాలేవీ ఫలించకపోవడంతో విశ్వాస పరీక్షకు ముందే అస్త్రసన్యాసం చేయాలని కుమారస్వామి నిర్ణయించుకున్నట్టు తెలుస్తోంది. గవర్నర్‌ వాజుభాయ్‌ వాలా ఇప్పటికే బలనిరూపణకు సంబంధించి రెండు సార్లు డెడ్‌లైన్‌లు విధించడం.. స్పీకర్‌ వాటిని ధిక్కరించడం వివాదాస్పదమైన విషయం తెలిసిందే. ఇక మరోసారి అదే జరిగితే తమకు చెడ్డపేరు వస్తుందని బీజేపీ, జేడీఎస్ నేతలు భావిస్తున్నట్లు తెలుస్తోంది. విశ్వాస తీర్మానంపై ఓటింగ్‌ తప్పదని స్పీకర్‌ సంకేతాలు ఇవ్వడం, బల పరీక్షలో నెగ్గే అవకాశాలు కన్పించకపోవడంతో సీఎం కుమారస్వామి రాజీనామాకే మొగ్గు చూపుతున్నట్లు సమాచారం.