'పవర్' కోసం పవన్ కళ్యాణ్ తో కుమారస్వామి

పవన్ కళ్యాణ్ సినిమాల్లోనే కాదు, రాజకీయాల్లోనూ పవర్ స్టార్. పవన్ కళ్యాణ్ రాజకీయ నాయకుడిగా మారి 'జనసేన' పార్టీని స్థాపించారు. జనసేన పార్టీ ఇప్పటివరకూ ఎన్నికల్లో పోటీచేయనప్పటికీ, గత ఎన్నికల్లో ఆంధ్రప్రదేశ్ లో తెలుగుదేశం పార్టీకి మద్ధతు పలికి రాష్ట్రంలో ఆ పార్టీ అధికారాన్ని కైవసం చేసుకోవడంలో పవన్ కళ్యాణ్ ముఖ్యపాత్ర పోషించారు. పవన్ కు తెలుగు రాష్ట్రాల్లోనే కాక, కర్ణాటకలోనూ మంచి ఫాలోయింగ్ ఉంది. ఇప్పుడు ఆ పవర్ ఫాలోయింగ్ ను కర్ణాటక రాష్ట్రంలో కూడా వాడుకోవాలని చూస్తున్నారు. రెండురోజుల క్రితం పవన్ కళ్యాణ్ కర్ణాటక మాజీ ముఖ్యమంత్రి అయిన కుమారస్వామితో భేటీ అయ్యారు. వీరి కలయిక వెనుక రాజకీయ, సినిమా పరమైన పలు అంశాలు ఉన్నట్లు విశ్లేషిస్తున్నారు.



కర్ణాటకలో ఎన్నికలకు ఇంకా రెండేళ్ల సమయం ఉంది. అందుకోసం ఇప్పట్నించే పవన్ కళ్యాణ్ మద్ధతు కోరడం ఆసక్తి కలిగించే విషయం. మరోవైపు కుమారస్వామి తనయుడు నిఖిల్ గౌడ 'జాగ్వార్' అనే భారీ బడ్జెట్ మూవీ ద్వారా హీరోగా ఎంట్రీ ఇవ్వనున్నాడు. ఈ సినిమా కన్నడ, తెలుగులో కూడా విడుదల చేయటానికి ప్లాన్ చేస్తున్నారు. తన కొడుకు సినిమాకి కూడా మద్ధతివ్వాల్సిందిగా పవన్ ను కోరినట్లు సమాచారం. వీరి భేటీ అనంతరం కుమారస్వామి మాట్లాడుతూ తమది రాజకీయ భేటీ కాదని, మర్యాదపూర్వకమైన భేటీ అని చెప్తూనే.. ' ఏపీ రాజకీయాల్లో పవర్ స్టార్ కు ప్రత్యేకస్థానం ఉంది, ఆ దేవుడి నిర్ణయం మేరకు సరైన సమయంలో పవన్ ముందడుగు వేస్తారు' అని పేర్కొన్నారు.



మరోవైపు పవన్ కళ్యాణ్ ఏపి ప్రత్యేక హోదా గురించి పోరాడటం మర్చిపోయి పవర్ కోసమే ప్రయత్నిస్తున్నారని ఆయనపై విమర్శలు వస్తున్నాయి. ఇదే విషయాన్ని పవన్ ను ప్రశ్నించగా ' హోదాపై అనాలోచితంగా మాట్లాడను, కేంద్ర ప్రభుత్వం హోదా ఇవ్వనని చెప్పలేదు, ఒకవేళ ఇవ్వనని చెప్తే అప్పుడు మాట్లాడతాను' అని పేర్కొన్నారు. ఈ వ్యాఖ్యలు పవన్ పై విమర్శలను పెంచాయి. ఏదేమైనా పవన్ కళ్యాణ్ ఇటూ ఆంధ్రప్రదేశ్ రాజకీయాల్లో , అటూ కర్ణాటక రాజకీయాల్లో 'పవర్' గేమ్ ఆడటం ఖాయంగా కనిపిస్తోంది.