‘బీజేపీ’ వార్నింగ్: యువతి ఆత్మహత్య!

బీజేపీ యువ మోర్చా కార్యకర్తలు.. ఓ యువతి ఆత్మహత్యకు కారణమయ్యారు. ఈ ఘటన కర్ణాటకలోని చిక్‌మంగళూరులో చోటు చేసుకుంది. బీకామ్ చదువుతున్న ధన్యశ్రీ (20) ఫేస్‌బుక్‌లో ముస్లిం స్నేహితుడితో మాట్లాడుతూ, అతడి పోస్టులు లైక్ చేస్తుండేది. దీంతో, సంతోష్ అనే స్నేహితుడు ముస్లిం వ్యక్తులతో మాట్లాడొద్దని వాట్సాప్‌లో హెచ్చరించాడు. ఇందుకు ఆమె ‘ఐ లవ్ ముస్లిమ్స్’ అని సమాధానం ఇచ్చింది.

దీంతో సంతోష్ ముస్లిం ధన్యశ్రీ చాటింగ్‌‌లో చెప్పిన వ్యాఖ్యలను స్క్రీన్ షాట్ తీసి... స్థానిక భజరంగ్ దళ్, వీహెచ్‌పీ సభ్యులకు పంపాడు. ఆ మెసేజ్ వైరల్‌గా మారి మొత్తం కర్ణాటక అంతా పాకింది. శుక్రవారం బీజేపీ యూత్ వింగ్ నాయకుడు అనిల్ రాజ్ ధన్యశ్రీ నివాసానికి వెళ్లి ఆమెను, ఆమె తల్లిని తీవ్రంగా హెచ్చరించాడు. అది ‘లవ్ జీహాద్’ అని, ముస్లిం యువత వలలో చిక్కుకోవద్దని హెచ్చరించడమే కాకుండా, అవమానపరిచారు.

ఈ ఘటన తర్వాత ఆమె తీవ్ర ఆందోళనకు గురైంది. బయటకు వెళ్లలేని పరిస్థితి నెలకొంది. దీంతో శనివారం ఆత్మహత్య చేసుకుంది. ఈ సందర్భంగా రాసిన సూసైడ్ లెటర్‌లో బీజేపీ యువ నేతల వల్ల తాను తలెత్తుకోలేని పరిస్థితి నెలకొందని పేర్కొంది. తన వ్యక్తిగత జీవితానికి భంగం వాటిల్లడంతోపాటు కళాశాలకు వెళ్లి చదువుకోలేని పరిస్థితి నెలకొందని తెలిపింది. ఆమెను ఆత్మహత్యకు పురిగొలిపాడనే ఆరోపణతో పోలీసులు అనిల్ రాజ్‌ను అరెస్టు చేశారు.