వెంటాడుతున్న కొత్త కరోనా భయం..కర్ణాటకలోనూ రాత్రిపూట కర్ఫ్యూ

కొత్తరకం కరోనా వైరస్ భయంతో ప్రపంచం ఉక్కిరిబిక్కిరవుతోంది. బ్రిటన్‌లో ఈ మహమ్మారి రూపం మార్చుకుని విజృంభించడంతో ఆ దేశం నుంచి వచ్చే విమానాలపై భారత్ డిసెంబరు 31 వరకు నిషేధం విధించింది. ఇప్పటికే లండన్ నుంచి వచ్చిన వివిధ నగరాల్లోని 25 మందికి వైరస్ నిర్ధారణ కావడంతో కేంద్రం కీలక సూచనలు చేసింది. నవంబరు 25 తర్వాత యూకే నుంచి, ఆ దేశం మీదుగా వచ్చిన ప్రయాణీకులకు కొత్త మార్గదర్శకాల పరిధిలోకి చేర్చింది.

మరోవైపు, కొత్తరకం స్ట్రెయిన్‌పై పలు రాష్ట్ర ప్రభుత్వాలు అప్రమత్తమయ్యాయి. మహారాష్ట్ర ప్రభుత్వం మళ్లీ రాత్రిపూట కర్ఫ్యూను అమల్లోకి తెచ్చింది. తాజాగా ఆ జాబితాలో కర్ణాటక కూడా చేసింది. డిసెంబరు 23 నుంచి జనవరి 2 వరకు రాత్రిపూట కర్ఫ్యూ అమల్లో ఉంటుందని కర్ణాటక ప్రభుత్వం ప్రకటించింది. రాత్రి 10 గంటల నుంచి ఉదయం 6 గంటల వరకు ప్రజల ఎవరూ బయట తిరగవద్దని సూచించింది. ఈ నిబంధనలు తూ.చ. తప్పకుండా పాటించాలని, ఎవరైనా వీటిని అతిక్రమిస్తే కఠిన చర్యలు తీసుకుంటామని హెచ్చరింది.

విదేశాల నుంచి వచ్చే వారు తప్పనిసరిగా 14 రోజుల పాటు క్వారంటైన్‌లో ఉండాలని స్పష్టం చేసింది. డిసెంబర్ 7 నుంచి రాష్ట్రంలో అడుగుపెట్టిన ప్రయాణికుల వివరాలు ఇవ్వాలని బెంగళూరు, మంగళూరు అంతర్జాతీయ విమానాశ్రయాలను కోరింది. బ్రిటన్‌ నుంచి వచ్చే ప్రయాణికులకు తప్పనిసరిగా ఆర్టీ-పీసీఆర్‌ పరీక్షలు చేయాలని ఆదేశించింది.

ముంబై సహా పలు ప్రధాన నగరాల్లో రాత్రి వేళ కర్ఫ్యూ అమల్లో ఉంటుందని మహారాష్ట్ర ముఖ్యమంత్రి ఉద్ధవ్ థాక్రే సోమవారం సాయంత్రం ప్రకటించారు. రాత్రి 11 గంటల నుంచి ఉదయం 6 గంటల వరకు కర్ఫ్యూ అమల్లో ఉంటుందని తెలిపారు. జనవరి 5 వరకు ఇది కొనసాగుతుందని స్పష్టం చేశారు. కరోనా వైరస్‌లో వెలుగుచూసిన వైవిధ్యం అంటువ్యాధిగా మారి, వేగంగా వ్యాప్తి చెందే అవకాశం ఉందని ఆరోగ్య మంత్రిత్వశాఖ తన ప్రకటనలో పేర్కొంది.