గోవధ నిషేధ చట్టంపై కర్ణాటక మంత్రి షాకింగ్ కామెంట్స్

కర్ణాటకలో గోవధ నిషేధ చట్టం అమల్లోకి వచ్చింది. కర్ణాటక శాసనసభ శీతాకాల సమావేశాల్లో భాగంగా ఈ బిల్లుకు ఆమోదం తెలిపారు. తాజా చట్టం ప్రకారం 13 ఏళ్ల లోపు ఆవులు, ఎద్దులు, దున్న, గేదెలను వధించడాన్ని తీవ్ర నేరంగా పరిగణిస్తారు. 13 ఏళ్లు దాటిన ఎద్దును పరిశోధన కోసం, లేదా అనారోగ్యం పాలైనట్టు పశువైద్యులు నిర్ధారిస్తే వధించవచ్చు. అలాగే, వాటిని వధించేందుకు ఇతర రాష్ట్రాలు, దేశాలకు తరలించడం కూడా నేరంగా పరిగణిస్తారు. ఈ నిబంధనలు ఉల్లంఘించి గోవ వధకు పూనుకుంటే మూడేళ్ల నుంచి ఏడేళ్ల వరకు జైలు శిక్ష తప్పదు. అలాగే, రూ. 50 వేల నుంచి రూ.5 లక్షల వరకు జరిమానా విధిస్తారు. ఇప్పటి వరకు గుజరాత్, ఉత్తరప్రదేశ్‌లో ఈ చట్టం అమల్లో ఉండగా... తాజాగా, కర్ణాటక ఆ జాబితాలో చేరింది.

ఈ చట్టంపై కర్ణాటక డిప్యూటీ సీఎం అశ్వత్థ నారాయణ్ మాట్లాడుతూ.. గో సంరక్షకులకు ముప్పు పొంచి ఉందన్నారు. ఎవరైనా ఒక కారణం కోసం పనిచేస్తున్నారని, చట్టం ఖచ్చితంగా పనిచేయడానికి ఒక పరిధి కలిగి ఉందని అన్నారు. దేశవ్యాప్తంగా 2015 నుంచి గోవధకు సంబంధించి 115 హింసాత్మక ఘటనలు చోటుచేసుకోగా, 46 మంది ప్రాణాలు కోల్పోయారు. మరో 146 మంది గాయపడ్డారు. కానీ, కర్ణాటకలో కేవలం గో రక్షకులు మాత్రమే చనిపోయారని మంత్రి అన్నారు. రాష్ట్రంలో గో సంరక్షకుల జీవితాలు ప్రమాదంలో ఉన్నాయన్నారు.

పశువుల వ్యాపారులు పూర్తిగా ఆధిపత్యం చెలాయించి, ప్రాణాలను బలిగొంటున్నారని మంత్రి వ్యాఖ్యానించారు. ఈ విషయాలు బయటకు తెలియడంలేదన్నారు. బిల్లుపై వస్తున్న అభ్యంతరాలను మంత్రి కొట్టిపావేశారు. పశు సంపద పెంచి, వ్యవసాయం, పశుసంవర్ధక వృద్ధికి ప్రభుత్వం ప్రయత్నిస్తుందన్నారు. అలాగే, గోవు సాంస్కృతిక ప్రాముఖ్యతను నొక్కి చెప్పారు. మన సంస్కృతిని మనం రక్షించుకోవాలి.. ప్రోత్సహించాలి. ఈ చట్టం తేవడం వెనుక ఉన్న ప్రధాన కారణం ఇదే.. మరే ఇతర దురుద్దేశం లేదు అని ఆయన అన్నారు.