రాసలీలల సీడీ: మంత్రి రమేశ్ రాజీనామా

సాయం కోరుతూ వచ్చిన మహిళను లైంగికంగా వేధించినట్లు ఆరోపణలు ఎదుర్కొంటున్న కర్ణాటక జల వనరుల శాఖ మంత్రి రమేశ్‌ జర్కిహోలీ తన పదవికి రాజీనామా చేశారు. ముఖ్యమంత్రి యడియూరప్పకు రాజీనామా లేఖను పంపినట్లు తెలిపారు. అయితే.. తాను నిర్దోషినని, తన ప్రతిష్ట మసకబార్చేందుకు ఎవరో కావాలనే ఆ వీడియో రూపొందించారని పేర్కొన్నారు. వీడియోలో కనిపిస్తున్న మహిళను తాను ఎప్పుడూ చూడలేదన్నారు. తనపై చేసిన ఆరోపణలను రుజువు చేస్తే రాజకీయాల నుంచి తప్పుకుంటానన్నారు.

‘నాపై వచ్చిన ఆరోపణలన్నీ అవాస్తవం. వాటిపై తక్షణమే దర్యాప్తు జరపాలి. నేను ఏ తప్పూ చేయలేదు. అయితే, నైతిక బాధ్యత వహిస్తూ రాజీనామా చేస్తున్నా. ముఖ్యమంత్రి యడియూరప్పతో మాట్లాడా. నాపై తీవ్రమైన ఆరోపణలు చేశారు. సమగ్ర దర్యాప్తు జరిపించి, దోషులపై కఠిన చర్యలు తీసుకోవాలని కోరా’ అని రమేశ్‌ జర్కిహోలి అన్నారు.

తన ఫొటోలను మార్ఫింగ్ చేసి ఎవరో ఆ సీడీని రూపొందించారని మంత్రి రమేశ్ ఆరోపించారు. సమగ్ర దర్యాప్తు చేస్తే అన్ని విషయాలు వెలుగులోని వస్తాయని అన్నారు. దర్యాప్తును ఎదుర్కొంటానని.. వెనుకంజ వేయబోనని ప్రకటించారు.

మంత్రి రమేశ్ జర్కిహోలి ఓ మహిళతో సన్నిహితంగా మెలిగినట్లుగా ఉన్న దృశ్యాలకు సంబంధించిన సీడీలు కర్ణాటకలో దుమారం రేపుతున్నాయి. ఉద్యోగం ఇప్పిస్తానని చెప్పి ఆ మంత్రి తనను లైంగిక అవసరాలకు వాడుకున్నారని సదరు మహిళ ఆరోపించారు. ఆమె తరఫున దినేశ్ అనే స్వచ్ఛంద కార్యకర్త పోలీసులకు ఫిర్యాదు చేశారు. బాధితురాలికి ప్రాణ హాని ఉందని ఫిర్యాదుదారు ఆరోపించారు.

తాను మైసూరులో చాముండేశ్వరీ దేవి ఆలయానికి వెళ్లిన మాట నిజమేనని.. కానీ, అక్కడ ఎవరినీ కలవలేదని మంత్రి రమేశ్ తెలిపారు. వీడియోలో కనిపిస్తున్న మహిళతో తాను మాట్లాడలేదని చెబుతున్నారు. కర్ణాటకలో జేడీయూ-కాంగ్రెస్ ప్రభుత్వం కుప్పకూలడంలో కీలకంగా వ్యవహరించిన రమేశ్ జర్కిహోళిపై వచ్చిన ఆరోపణలు ఆ రాష్ట్రంలో సంచలనంగా మారాయి.