జయ ఆరోగ్యంపై కరుణానిధి భార్య ఆరా

చెన్నైలోని అపోలో ఆసుపత్రిలో చికిత్స పొందుతున్న తమిళనాడు ముఖ్యమంత్రి జయలలితను డీఎంకే అధినేత కరుణానిధి భార్య రజతి అమ్మాళ్ పరామర్శించారు. గురువారం రాత్రి ఆసుపత్రికి వెళ్లిన అమ్మాళ్.. జయలలితను పరామర్శించిన తరవాత జయ ఆరోగ్య పరిస్థితిని ఆమె స్నేహితురాలు శశికళ నటరాజన్‌ను అడిగి తెలుసుకున్నారని డీఎంకే వర్గాలు వెల్లడించాయి.
రజతి అమ్మాళ్‌ వెంట ఆమె కూతురు, రాజ్యసభ ఎంపీ కనిమొళి కూడా ఉన్నారు. జయలలిత వీలైనంత త్వరగా కోలుకోవాలని వీరిద్దరూ ఆకాంక్షించారు. రజతి కంటే ముందు శనివారం నాడు డీఎంకే నేతలు ఎంకే స్టాలిన్, దురైమురుగన్, పొన్ముది జయలలితను పరామర్శించారు. అలాగే లోక్‌సభ డిప్యూటీ స్పీకర్ ఎం. తంబీదురై, రాష్ట్ర ఆర్థిక శాఖ మంత్రి పన్నీర్ సెల్వం, ఆరోగ్య శాఖ మంత్రి విజయ భాస్కర్ జయను పరామర్శించిన వారిలో ఉన్నారు. వీరంతా జయలలిత త్వరగా కోలుకుంటారని ఆశాభావం వ్యక్తం చేశారు.