శబరిమల హింస.. కేరళ సీఎం వార్నింగ్!

50ఏళ్ల లోపు మహిళలు శబరిమల అయ్యప్ప ఆలయంలోకి ప్రవేశంతో కేరళలో గత నాలుగు రోజులుగా సాగుతోన్న హింసాత్మక ఘటనలకు సోమవారం నాటికి కొంత సద్దుమణిగాయి. కేరళ వ్యాప్తంగా జరిగిన హింసాత్మక ఘటనలపై 1,869 కేసులు నమోదు కాగా, 5,769 మందిని అదుపులోకి తీసుకున్నారు. బీజేపీ-ఆర్ఎస్ఎస్, సీపీఎం కార్యకర్తలు ఒకరిపై ఒకరు నాటు బాంబులు, రాళ్లతో దాడులకు పాల్పడ్డారు. ఈ అంశంపై స్పందించిన కేరళ సీఎం విజయన్.. అన్ని వయసుల మహిళలను శబరిమల ఆలయంలోకి అనుమతించాలన్న సుప్రీంకోర్టు ఆదేశాలను అమలుచేయడం ప్రభుత్వ బాధ్యతని ఉద్ఘాటించారు. అంతేకాదు, హింసాత్మక ఘటనలతో బెదిరింపులకు పాల్పడితే సహించబోమని సీఎం హెచ్చరించారు.

రాష్ట్రంలో హింసాత్మక ఘటనలను మానుకోవాలని కేరళలోని తమ శ్రేణులకు బీజేపీ జాతీయ నాయకత్వం సూచనలు ఇవ్వాలని విజయన్ పేర్కొన్నారు. రాజ్యాంగ విధుల్లో భాగంగా సుప్రీంకోర్టు ఆదేశాలను పాటించడం రాష్ట్ర ప్రభుత్వ కర్తవ్యమని, ఈ అంశంలో బీజేపీ, ఆర్ఎస్ఎస్‌లు అడ్డంకులు సృష్టిస్తూ రాజ్యాంగ స్ఫూర్తికి విఘాతం కలిగించేలా బెదరింపులకు పాల్పడుతున్నాయని తన ఫేస్‌బుక్‌ ఖాతాలో విజయన్ పోస్ట్ చేశారు. మరోవైపు, రాష్ట్రానికి వ్యతిరేకంగా గళం ఇప్పిన బీజేపీ కార్యకర్తలను సీపీఎం ప్రభుత్వం అన్యాయంగా అరెస్ట్ చేయిస్తోందని కేంద్ర మంత్రి స్మృతీ ఇరానీ ఆరోపించారు.

అరెస్టులను ఆపకపోతే కేరళ ప్రభుత్వం తీవ్రమైన రాజ్యాంగ పరిణామాలను చవిచూడాల్సి వస్తుందని బీజేపీ జాతీయ అధికార ప్రతినిధి జీవీఎల్ నర్సింహారావు హెచ్చరించాడు. అయితే, ఉత్తర భారతదేశంలోనే అనుసరించి విధానాలను ఇక్కడ కూడా అమలు చేయడానికి సంఘ్ పరివార్ ప్రయత్నిస్తోందని విజయన్ ఆరోపించారు. హింసాత్మక ఘటన, మత ఘర్షణలకు పాల్పడితే రాష్ట్ర ప్రభుత్వం వాటిని ఉక్కుపాదంతో అణచివేస్తుందని, ఆర్ఎస్ఎస్ ప్రయత్నాలు కేరళలో విజయవంతం కాబోవని విజయన్ హెచ్చరించారు.