యువజన సంఘాల్లో ఎక్కువ మంది తాగుబోతులే : కేరళ మంత్రి

కేరళకు చెందిన ఓ మంత్రి వివాదాస్పద వ్యాఖ్యలు చేశారు. మాదక ద్రవ్యాల దుర్వినియోగం, అక్రమ రవాణా వ్యతిరేక అంతర్జాతీయ దినోత్సవం సందర్భంగా ఆదివారం ఓ కార్యక్రమం జరిగింది. దీనికి కేరళ ఎక్సైజ్ మంత్రి ఎంవీ గోవిందన్ అథిగా పాల్గొన్నారు. ఈ సందర్భంగా డ్రగ్స్, మద్యం విషయంలో అందరికి అవగాహన కల్పించి, చైతన్య పరచాలన్నారు. ఇదే సమయంలో యువజన, విద్యార్థి సంస్థలపై సంచలన వ్యాఖ్యలు చేశారు. మద్యం, మత్తు పదార్థాలపై జాగృతం చేయాల్సిన యువజన సంఘాల్లోనే చాలామంది తాగుబోతులున్నారని అన్నారు. "రాష్ట్రంలోని వివిధ యువజన సంఘాల విద్యార్థుల్లో ఎక్కువ మంది తాగుబోతులని నేను గమనించాను." అని మంత్రి గోవిందన్ అన్నారు. "ఇటీవల యువజన సంఘాల సహకారంతో అవగాహన కల్పించేందుకు ప్రయత్నించాం. కానీ నిశితంగా పరిశీలిస్తే, సంస్థలలో మంచి సంఖ్యలో యువత మద్యానికి బానిసలు అని తేలింది. మద్యం సేవించే వారి సంఖ్య తగ్గుతున్నప్పటికీ, యువకులు, విద్యార్థి సంఘాల్లో మద్యపానం చేసే వారి సంఖ్య పెరుగుతోంది, నేను ఎవరినీ లక్ష్యంగా చేసుకుని ఈ మాటలు అనడం లేదు" అని గోవిందన్ అన్నారు.

అలాగే కేరళ డ్రగ్స్‌ హబ్‌గా మారిందని మంత్రి గోవిందన్ చెప్పుకొచ్చారు. భారీ మొత్తంలో డ్రగ్స్ కేరళకు చేరుతున్నాయని, ఇటీవల కొచ్చి తీరంలో సముద్రంలో బోటులో రూ.1,500 కోట్ల విలువైన డ్రగ్స్ పట్టుబడ్డాయని ఆయన చెప్పారు. కేరళతో పాటు పొరుగు రాష్ట్రాలైన తమిళనాడు, మహారాష్ట్రకు కూడా సముద్ర మార్గంలో డ్రగ్స్‌ రవాణా అవుతున్నట్టు సమాచారం ఉందన్నారు. ఏదిఏమైనా మద్యంపై కొత్త తరానికి నిజాయితీ నిబద్ధతతో అవగాహన కార్యక్రమాలను రూపొందించాలన్నారు. అలాగే వృత్తిపరమైన సంస్థలతో సహా హయ్యర్ సెకండరీ, హైస్కూల్, కాలేజీల్లోని విద్యార్థులు అవగాహన కల్పించడానికి చిత్తశుద్ధితో కృషి చేయాల్సిన అవసరం ఉందని గోవిందన్ అన్నారు.