Rahul Gandhiని ముద్దాడిన యువకుడు.. రాహుల్ రియాక్షన్ ఏంటంటే..?

కేరళ పర్యటనలో ఉన్న కాంగ్రెస్ నేత రాహుల్ గాంధీకి సొంత నియోజకవర్గం వయనాడ్‌లో ఊహించని షాక్ ఎదురైంది. ఓ యువకుడు రాహుల్‌ను హత్తుకొని బుగ్గ మీద ముద్దుపెట్టుకున్నాడు. అనూహ్య పరిణామంతో మొదట షాకైన కాంగ్రెస్ నేత.. తర్వాత తేరుకున్నారు. నవ్వుతూ అతడికి షేక్ హ్యాండిచ్చారు. ఓ కార్యక్రమంలో పాల్గొని తిరిగి వెళ్లడానికి సిద్ధపడుతున్న రాహుల్ గాంధీ వాహనంలోని ముందు సీట్లో కూర్చున్నారు.

అభిమానులు, మీడియా రాహుల్ దగ్గరకు వచ్చారు. ఓ యువకుడు షేక్ హ్యాండ్ ఇవ్వడానికి కారు దగ్గరకొచ్చాడు. రాహుల్‌ కూడా షేక్ హ్యాండ్ ఇవ్వడం కోసం చేతిని ముందుకు చాపారు. కానీ అతడు మరింత ముందుకొచ్చి కారు విండో నుంచి రాహుల్ మెడ మీద చేయిపెట్టి దగ్గరకు లాక్కొని రాహుల్ బుగ్గ మీద ముద్దు పెట్టాడు.

వెంటనే అప్రమత్తమైన భద్రతా సిబ్బంది ఆ యువకుడిని పక్కకు లాగారు. కానీ రాహుల్ నవ్వుతూ అతడికి షేక్ హ్యాండ్ ఇచ్చి వెళ్లారు. ఈ వీడియో సోషల్ మీడియాలో వైరల్‌గా మారింది.

రాహుల్‌కు ముద్దు అనుభవం ఎదురవడం ఇదే తొలిసారి కాదు. గత ఫిబ్రవరిలో వాలెంటైన్స్ డే రోజున గుజరాత్‌లోని వాల్సాడ్‌లో ఓ మహిళ రాహుల్‌ను దగ్గరకు తీసుకొని చెంప మీద ముద్దాడింది. అతడు నా సోదరుడి లాంటోడని తెలిపింది.