మహిళపై వేధింపులు: మంత్రి రాజీనామా

ఓ మహిళను లైంగిక వేధింపులకు గురిచేశారని ఆరోపణలు రావడంతో కేరళ రవాణా శాఖ మంత్రి ఎ.కె. శశీంద్రన్ తన పదవికి రాజీనామా చేశారు. మంత్రి ఓ మహిళను లైంగికంగా వేధిస్తున్నారని, ఆమెతో ఫోన్లో అసభ్యకరంగా మాట్లాడారని మంగళం టీవీ కథనం ప్రసారం చేసింది. మంత్రి మాటలతో కూడిన ఆడియో టేప్‌ను కూడా ప్లే చేసింది. దీంతో మంత్రిపై ప్రతిపక్షాలు, ప్రజలు విమర్శల బాణాలు ఎక్కుపెట్టారు.

అయితే మంత్రి పదవికి తాను రాజీనామా చేస్తున్నట్లు శశీంద్రన్ ఆదివారం కోజికోడ్‌లో ప్రకటించారు. ఈ విషయాన్ని ముఖ్యమంత్రి పినరయి విజయన్‌కు కూడా వెల్లడించినట్లు చెప్పారు. రాజీనామా చేసినంత మాత్రాన తాను తప్పు ఒప్పుకున్నట్లు కాదని అన్నారు. తనపై వచ్చిన ఆరోపణలపై లోతుగా విచారణ చేపట్టాలని సీఎంకి విన్నవించినట్లు చెప్పారు. అయితే పార్టీ, కూటమి విలువలను కాపాడాల్సిన బాధ్యత తనపై ఉందని, అందుకే పదవికి రాజీనామా చేస్తున్నానని వివరించారు.

ఈ ఏడాది కాలంలో సీఎం పినరయి విజయన్ నేతృత్వంలోని ఎల్డీఎఫ్ ప్రభుత్వంలో రాజీనామా చేసిన రెండో మంత్రి శశీంద్రన్. రాష్ట్ర పరిశ్రమల శాఖ మంత్రి ఇ.పి. జయరాజన్ అక్టోబర్‌లో తన పదవికి రాజీనామా చేశారు. తన కుటుంబ సభ్యులకి ఉన్నతమైన ప్రభుత్వ ఉద్యోగాలు ఇప్పించారనే ఆరోపణలతో జయరాజన్ రాజీనామా చేశారు. కాగా, నేషనలిస్ట్ కాంగ్రెస్ పార్టీ (ఎన్సీపీ) నుంచి ఎ.కె.శశీంద్రన్ ఐదుసార్లు ఎమ్మెల్యేగా ఎన్నికయ్యారు.