శ్రీకాళహస్తిలో జస్టిస్ కర్ణన్.. అరెస్టుకు రంగం సిద్ధం!

కోర్టు ధిక్కరణ కేసులో సుప్రీం కోర్టు ఆర్నెళ్ల జైలు శిక్ష విధించిన కలకత్తా హైకోర్టు వివాదాస్పద న్యాయమూర్తి జస్టిస్ సి.ఎస్.కర్ణన్‌ అరెస్టుకు రంగం సిద్ధమైంది. ఆయన్ని కస్టడీలోకి తీసుకొనేందుకు కోల్‌కతా పోలీసులు బుధవారం చెన్నైకి చేరుకున్నారు. సుప్రీం కోర్టు ఇచ్చిన అరెస్టు వారెంట్‌తో చెన్నైలోని కర్ణన్ నివాసానికి వెళ్లారు. అయితే కర్ణన్ అక్కడ లేకపోవడం, సెల్ ఫోన్ స్విచాఫ్ రావడంతో కోల్‌కతా పోలీసులు చెన్నై పోలీసుల సహాయం తీసుకున్నారు.

జస్టిస్ కర్ణన్ ఆంధ్రప్రదేశ్‌లోని ప్రముఖ పుణ్యక్షేత్రమైన శ్రీకాళహస్తిలో ఉన్నట్లు తెలుసుకున్న కోల్‌కతా పోలీసులు అక్కడికి చేరుకున్నారు. ఆయన్ని అరెస్టు చేసేందుకు ఆలయం బయట వేచిచూస్తున్నారు. కాగా, కర్ణన్‌ను తక్షణం కస్టడీలోకి తీసుకోవాలని భారత ప్రధాన న్యాయమూర్తి (సీజేఐ) జస్టిస్‌ జె.ఎస్‌.ఖేహర్‌ నేతృత్వంలోని ఏడుగురు న్యాయమూర్తుల ధర్మాసనం మంగళవారం పశ్చిమబెంగాల్‌ డీజీపీకి ఆదేశాలిచ్చింది.

సీజేఐతో పాటు మరో ఏడుగురు సుప్రీం కోర్టు న్యాయమూర్తులకు అయిదేళ్లు చొప్పున కఠిన కారాగార శిక్ష విధిస్తున్నట్లు జస్టిస్‌ కర్ణన్‌ సోమవారం ఉత్తర్వులు ఇచ్చిన విషయం తెలిసిందే. ఈ నేపథ్యంలో సుప్రీంకోర్టు ఆదేశాలు మంగళవారం వెలువడ్డాయి. పదవిలో ఉన్న హైకోర్టు న్యాయమూర్తికి కోర్టు ధిక్కరణ అభియోగాలపై ఇలాంటి శిక్ష విధించడం ఇదే తొలిసారి. జస్టిస్ కర్ణన్ వచ్చే నెల 11న ఆయన పదవీ విరమణ చేయాల్సి ఉంది.