'ఫ్రీ హగ్స్'..కోల్‌కతా యువత వినూత్న నిరసన

కమాన్ ఫ్రీ హగ్స్ అంటోంది కోల్‌కతా యువత. నిన్న మెట్రో ట్రైన్‌లో యువ జంటపై దాడికి వ్యతిరేకంగా వినూత్నంగా నిరసన చేపట్టారు. మోరల్ పోలీసింగ్‌పై మండిపడుతూ... టోలీగంజ్ మెట్రో స్టేషన్‌లో ఆందోళన చేశారు. ఫ్రీ హగ్స్... ఐ లవ్ కోల్‌కతా... హోకలింగన్ అంటూ ప్లకార్డులు ప్రదర్శించారు. కొంతమంది కౌగిలించుకుంటూ వారి నిరసనను తెలియజేశారు. కౌగిలించుకోవడం తప్పేం కాదని... ఇది కూడా ప్రేమ, ఆప్యాయత, అనురాగాలను సూచించే ఓ సంకేతమని నిరసనకు దిగిన యువత అభిప్రాయపడింది. నిన్న కూడా ఈ ఘటన జరిగిన దమ్, దమ్ మెట్రో స్టేషన్ దగ్గర కొంతమంది నిరసనకు కూడా దిగారు.


మరోవైపు ఈ ఘటనపై మెట్రో అధికారులు స్పందించారు. ఇలాంటి ఘటన జరగడం దురదృష్టకరమని... విచారణకు ఆదేశించినట్లు చెప్పారు. దాడికి సంబంధించిన సీసీ ఫుటేజ్‌ను పరిశీలించామని... పోలీసులకు కూడా దీనిని అప్పగించినట్లు తెలిపారు. ఇప్పటి వరకు బాధిత జంట నుంచి ఎలాంటి ఫిర్యాదు అందలేదని... తాము కూడా ఈ ఘటనపై పోలీసులతో కలిసి సమన్వయంతో ముందుకెళుతున్నామని పేర్కొన్నారు. భవిష్యత్‌లో ఇలాంటి ఘటనలు జరగకుండా మెట్రో స్టేషన్లలో భద్రతను పెంచుతామన్నారు అధికారులు.

సోమవారం రాత్రి ఓ యువ జంట మెట్రో ట్రైన్‌ లోపలే కౌగిలించుకున్నారు. జంటను చూసిన తోటి ప్రయాణికులకు కోపం కట్టలు తెంచుకొంది. వెంటనే ఇద్దరిని బయటకు లాగి దాడి చేశారు. యువకుడిపై పిడి గుద్దులు కురిపించారు. ఈ దాడి కొంతమంది ఈ సీన్ మొత్తాన్ని మొబైల్‌లో రికార్డు చేయగా... సోషల్ మీడయాలో వైరల్‌గా మారింది. మెట్రో రైల్ ఆఫీస్‌కు కూడా ఈ ఫొటోలు చేరడంతో అధికారులు విచారణ చేపట్టారు.
Also Read