ఒక్క రోజు కుండపోత.. కరవు సీమలో రైతన్న ఆనంద హేళ!

వర్షాలు సకాలంలో కురవకపోతే.. రైతన్నలు పడే బాధ అంతా ఇంతా కాదు. వానలు పడకపోతే పంటలు పండవు. దీని ప్రభావం ఒక్క రైతాంగం మీదే దేశ ప్రజలందరి మీదా ఉంటుంది. పంట దిగుబడి తగ్గితే ఆహార ధాన్యాల ధరలు కొండెక్కుతాయి. ప్రస్తుతం తెలుగు రాష్ట్రాల్లో వర్షాభావ పరిస్థితులు నెలకొన్న తరుణంలో.. రైతన్నలు ఒక్క భారీ వర్షం కురిస్తే బాగుండని కోరుకుంటున్నారు. ఇక్కడ అరకొరగా కురుస్తున్న వర్షాలు ఉత్తరాదిన మాత్రం కుండపోతలా కురుస్తున్నాయి.

గుజరాత్‌లోని వర్షాభావ ప్రాంతమైన కచ్‌లో వాగులు, వంకలు ఉప్పొంగి ప్రవహిస్తున్నాయి. వాస్తవానికి కచ్‌ ప్రాంతంలో గతేడాది కరువు వచ్చింది. ఈసారి కూడా వానలు పడకపోతే ఎలా అని జనం బెంగ పెట్టుకున్నారు. కానీ మంగళవారం సాయంత్రం నుంచి బుధవారం సాయంత్రం వరకు కుండపోత వర్షం కురిసింది. ఒక్క రోజే సగటున 58 మిల్లీ మీటర్ల వర్షం కురిసింది. అబ్డాసాలో 66 మి.మీ. వర్షం కురవగా.. అంజర్‌లో 74 మి.మీ., మండ్వీలో 120 మి.మీ. వర్షపాతం నమోదైంది. కుండపోత వర్షం కారణంగా ఈ ప్రాంతంలోని చెరువులు, చిన్న డ్యామ్‌లు అలుగు పోస్తున్నాయి.
చాలా ఏళ్ల తర్వాత జలసిరి ఉట్టిపడుతోన్న నారాయణ్ సరోవర్, పాలార్‌గుణ ఫాల్స్‌ను చూడటం కోసం జనం పోటెత్తుతున్నారు. కరవుకు కేరాఫ్ లాంటి ప్రాంతంలో భారీ వర్షం కురవడంతో.. గుజరాతీల ఆనందానికి హద్దులేకుండా పోయింది. మన దగ్గర కూడా ఇలాంటి వర్షం కురిస్తే బాగుంటుంది కదూ.