ముఖ్యమంత్రి కుర్చీలో మాజీ ముఖ్యమంత్రి!

బీహార్ మాజీ ముఖ్యమంత్రి, ఆర్జేడీ చీఫ్ లాలూ ప్రసాద యాదవ్ తాజా సీఎం నితీష్ కుమార్ సీట్లో కూర్చున్నారు. సీఎం సీట్లో అంటే ఆయన కుర్చీ లాక్కున్నారని అనుకోకండి. ఆదివారం పాట్నాలో జరిగిన ఓ సమావేశంలో సీఎం నితీష్ కు కేటాయించిన చైర్ లో కూర్చున్నారు. అయితే నిర్వాహకులు ఆ సీటు సీఎం కోసం కేటాయించిందని చెప్పడంతో..లూలా వెంటనే ఆ సీట్లో నుంచి లేచి ఆ పక్కనే ఉన్న మరో సీట్లో కూర్చున్నారు.

కొన్నిరోజుల క్రితం సిక్కు గురు గోవింద్ సింగ్ 350వ జయంతి వేడుకలకు ప్రధాన మంత్రి నరేంద్ర మోదీ ముఖ్యఅతిథిగా పాట్నాలో నిర్వహించిన కార్యక్రమానికి విచ్చేసినప్పుడు...సభా వేదికపై లాలూ ప్రసాద్ కు సీటు కేటాయించలేదని నిర్వాహకులపై ఆగ్రహం వ్యక్తం చేశారు. ప్రభుత్వంలో భాగస్వామి అయిన లాలూ పార్టీ.. ఆ సంఘటనతో సీఎం నితీష్ తో విబేధాలు తప్పవని అనుకున్నారు. అప్పటికే ప్రధానమంత్రి నోట్ల రద్దు నిర్ణయాన్ని నితీష్ బలంగా సమర్థించారు. లాలూ తీవ్రంగా వ్యతిరేకించారు. దీంతో నితీష్ ప్రభుత్వం నుంచి లాలూ బయటికి రావచ్చనే ఊహాగానాలు కూడా వినిపించాయి.

ఆదివారం జరిగిన సంఘటనలో లాలూ ఏమాత్రం ఆగ్రహంతో కనిపించకపోవడంతో నిర్వాహకులు ఊపిరి పీల్చుకున్నారు.