లాలూకి తీవ్ర అస్వస్థత... అసలు ఏమైంది

బీహార్ మాజీ సీఎం ఆర్జేడీ అధినేత లాలూకి ఏమయ్యింది. దాణా కుంభకోణం కేసులో శిక్ష అనుభవిస్తూ జైల్లో ఉన్న ఆయనకు సడన్‌గా ఏమయ్యింది. ఆస్పత్రిలో ఎందుకు చేరాల్సి వచ్చింది. ఇప్పుడు ఇదే ప్రశ్నలు అందర్ని వెంటాడుతున్నాయి. ఉన్నట్టుండి ఆయన్ను జైలు నుంచి హుటాహుటిన రిమ్స్ ఆస్పత్రిలో చేర్చారు. లాలూ తీవ్ర అస్వస్థతకు గురైనట్లు తెలుస్తోంది. ఆయన ఆరోగ్య పరిస్థితిని కార్డియాలీ విభాగం వైద్యులు పర్యవేక్షిస్తున్నట్లు తెలుస్తోంది. అయితే ఆస్పత్రికి తరలించినట్లు తెలుస్తున్నా... ఆరోగ్య పరిస్థితికి సంబంధించి డాక్టర్లు కాని... ఆస్పత్రి నుంచి ఎలాంటి హెల్త్ బులిటెన్ విడుదల కాలేదు. అయితే ఆయన గుండె సంబంధిత సమస్యతో ఆస్పత్రిలో చేరినట్లు తెలుస్తోంది.

తండ్రి అనారోగ్య పరిస్థితి గురించి తెలియగానే తనయుడు తేజ్ ప్రతాప్ యాదవ్ పాట్నా నుంచి రాంచీకి చేరుకున్నారు. రిమ్స్‌కు వెళ్లి డాక్టర్లతో మాట్లాడారు. లాలూ ఆరోగ్య పరిస్థితి ఎలా ఉందో అడిగి తెలుసుకున్నారు. అలాగే ఆర్జేడీ సీనియర్ నేత రఘువంశ్ ప్రసాద్ సింగ్‌తో పాటూ పార్టీ ముఖ్య నేతలుచ కార్యకర్తలు రిమ్స్ దగ్గరకు చేరుకున్నారు. లాలూ ఆరోగ్య పరిస్థితిపై ఆందోళన వ్యక్తం చేస్తున్నారు. తమ అధినేతను చూసేందుకు అనుమతి ఇవ్వడం లేదని... ఆయన ఆరోగ్యం ఎలా ఉందో కూడా కనీసం సమాచారం ఇవ్వడం లేదంటున్నారు. ఆయన అనారోగ్యంతో ఉన్నారని మీడియా ద్వారా తెలుసుకొని ఇక్కడికి వచ్చామంటున్నారు.