స్టడీ మెటీరియల్ సాకుతో.. విద్యార్థినిపై లెక్చరర్ అత్యాచారం!

విద్యాబుద్ధులు నేర్పాల్సిన లెక్చరరే ఓ విద్యార్థినిపై అత్యాచారానికి పాల్పడ్డాడు. కాలేజీ స్టాఫ్‌రూమ్‌కు పిలిపించుకొని అఘాయిత్యానికి ఒడిగట్టాడు. హిమాచల్‌ ప్రదేశ్‌లోని హమీర్‌పూర్‌కు చెందిన ఓ కాలేజీలో చోటు చేసుకున్న ఈ దారుణం ఆలస్యంగా వెలుగులోకి వచ్చింది. ప్రైవేట్ కాలేజీకి చెందిన కెమిస్ట్రీ లెక్చరర్.. స్టడీ మెటీరియల్ ఇస్తానని చెప్పి ఓ విద్యార్థినిని స్టాఫ్‌రూమ్‌కు పిలిపించుకున్నాడు. ఆ తర్వాత ఆమెను బెదిరించి కాళ్లు, చేతులను తాళ్లతో బంధించి అక్కడే అత్యాచారానికి పాల్పడ్డాడు.

ఆ విషయాన్ని ఎవరికైనా చెబితే ల్యాబ్ పరీక్షల్లో ఫెయిల్ చేయిస్తానని బెదిరించడంతో బాధితురాలు భయపడిపోయింది. బాధితురాలి స్నేహితురాళ్లతో కొంత మంది ఆమె పరాభవంగా ఉండటాన్ని గమనించి ప్రశ్నించగా.. జరిగిన అన్యాయాన్ని చెప్పుకొని బోరుమంది. విషయం కాస్తా తల్లిదండ్రులకు తెలియడంతో వారు పోలీసులను ఆశ్రయించారు.

ఈ అత్యాచార ఉదంతంపై హిమాచల్ ప్రదేశ్ అట్టుడుకుతోంది. రాష్ట్ర వ్యాప్తంగా పలు చోట్ల విద్యార్థినీ విద్యార్థులు తరగతులను బహిష్కరించి నిరసన వ్యక్తం చేశారు. నిందితుడికి ఉరిశిక్ష విధించాలని విద్యార్థి సంఘాలు ఏబీవీపీ, ఎస్‌ఎఫ్‌ఐ డిమాండ్ చేశాయి.

బాధితురాలి ఫిర్యాదుతో నిందితుడు కెమిస్ట్రీ లెక్చరర్‌ను పోలీసులు శుక్రవారం (ఫిబ్రవరి 16) అదుపులోకి తీసుకున్నారు. బాధిత బాలికను వైద్య పరీక్షల నిమిత్తం ఆసుపత్రికి తరలించారు. బాధితురాలితో పాటు నిందుతుడి వాంగ్మూలం నమోదు చేశామని, కేసు విచారిస్తున్నామని హమీర్‌పూర్ ఎస్పీ రమణ్ కుమార్ మీనా తెలిపారు.