జాతి వైరాన్ని మరిచిన చిరుత... పర్యాటకులతో వింత ప్రవర్తన.. షాకింగ్ వీడియో

అడవిలో ఉండే చిరుత మన ముందు ప్రత్యక్షమైతే ఒక్కసారిగా గుండె ఆగిపోయినట్లుగా అనిపించక మానదు. అలాంటిది చిరుత కళ్లముందు తిరుగుతుంటే అక్కడి వారు వణకలేదు.. భయపడలేదు. ఆ చిరుత కూడా జాతి వైరాన్ని మరిచి మనుషుల వద్దకు వచ్చి వింతగా ప్రవర్తించింది. చిన్నపిల్లలు తమను ఎత్తుకోమని మారం చేసినట్లుగా మనుషుల చేతులు పట్టుకుని వేలాడుతూ వింతగా ప్రవర్తించి అందరినీ ఆశ్చర్యానికి గురిచేసింది. ఈ ఘటన హిమాచల్‌ప్రదేశ్‌లోని తీర్థన్ వ్యాలీలో చోటుచేసుకుంది.

హిమాచల్‌ప్రదేశ్‌ అంటేనే పర్యాటకులకు స్వర్గధామం అన్న సంగతి తెలిసిందే. ఈ నేపథ్యంలో తీర్థన్ వ్యాలీకి పర్యాటకులు వాహనాల్లో వెళ్తుండగా ఓ చిరుత రోడ్డుపై కనిపించింది. దీంతో వారంతా తమ వాహనాలను ఆపేసి ఆసక్తిగా గమనించారు. పర్యాటకులు రోడ్డుపై నిలబడి ఉండగా ఆ చిరుత వారి పక్కనుంచే దర్జాగా నడుచుకుంటూ వెళ్లి.. మళ్లీ వెనక్కి తిరిగింది. ఓ వ్యక్తిపైకి ఎగబాకి ఎంతో పెంపుడు శునకంలా ప్రవర్తించింది. సుమారు నిమిషం పాటు పర్యాటకుల మధ్య తిరిగినా ఎవరికీ హాని చేయలేదు. ఈ వీడియోను ఐఎఫ్ఎస్ అధికారి ప్రవీణ్ కశ్వాన్ తన ట్విటర్ అకౌంట్లో పోస్ట్ చేశారు. ఈ వీడియో ఇప్పుడు సోషల్‌మీడియాలో వైరల్‌గా మారింది.