ఏటీఎంలు, పెట్రోల్ బంకుల వద్ద సినిమా చూపించిన ప్రకటన

హఠాత్తుగా ప్రధాని నరేంద్ర మోడీ చేసిన సంచలన ప్రకటన పౌరులని ఏటీఎంలు, పెట్రోలు బంకులవైపు పరుగులు తీసేలా చేసింది. నవంబర్ 8వ తేదీ అర్ధరాత్రి నుంచి మరో రెండు రోజులపాటు ఏటీఎంలు పనిచేయకపోగా, ప్రస్తుతం చలామణిలో వున్న రూ.500, 1000 నోట్లు ఇక చెల్లుబాటు కావు అని కేంద్రం చేసిన ప్రకటనే అందుకు కారణమైంది. భారీ సంఖ్యలో పౌరులు ఏటీఎంలు, పెట్రోలు బంకుల వద్ద క్యూ కట్టడంతో ఆయా ప్రాంతాల్లో రద్దీ ఏర్పడింది. దీంతో ఏటీఎంల సర్వర్లు డౌన్ అవడం, నెట్ వర్క్ మొరాయించడం వంటి సమస్యలతోపాటు నగదు నిల్వలు పూర్తి అవడం వంటి పరిణామాలు జనాలకి ఆగ్రహం తెప్పించాయి.

ఇదిలావుంటే, మరోవైపు పెట్రోలు బంకుల వద్ద వాహనదారుల ఇక్కట్లు కూడా ఇందుకు భిన్నమేమీకాదు. అనుకోకుండా వచ్చిన ప్రకటనపై అవగాహన లేకపోవడంతో కొంతమంది పెట్రోలు బంకుల యజమానులు మంగళవారం రాత్రి ప్రకటన వెలువడినప్పటి నుంచే రూ.500, 1000 నోట్లు తిరస్కరించడం మొదలుపెట్టారు. కానీ వాస్తవానికి నవంబర్ 12వ తేదీ వరకు పెట్రోలు బంకుల్లో ఈ పాత నోట్లు చలామణి అవుతాయని కేంద్రం స్పష్టంగా పేర్కొంది. అయినప్పటికీ ఈ విషయం తెలియని పెట్రోలు బంకుల యజమానులు రూ.500, 1000 నోట్లు తీసుకువచ్చినవారికి పెట్రోలు, డీజిల్ సరఫరా నిలిపివేసిన ఘటనలు చోటుచేసుకున్నాయి.
ఇంకొన్ని చోట్ల వాహనదారులు భారీగా క్యూ కట్టడంతో పెట్రోలు, డీజిల్ నిల్వలు ముగిశాయి. వాహదారులందరూ రూ.500, 1000 నోట్లే తీసుకురావడంతో తమ వద్ద తిరిగి ఇవ్వడానికి చిల్లర లేదు అంటూ ముంబైలోని ఓ పెట్రోలు బంకు వద్ద కనిపించిన బోర్డు ఇది.

అటు ఏటీఎంల వద్ద నిరాశపడి పెట్రోలు బంకుల వద్దకొస్తే, ఇక్కడ కూడా చేదు అనుభవం ఎదుర్కున్న వారు ఎక్కడికక్కడే ప్రభుత్వానికి వ్యతిరేకంగా నిరసనలు తెలిపారు.

ఎన్ని ఇక్కట్లు పడినా ప్రధాని మోడీ తీసుకున్న ఈ నిర్ణయాన్ని సమర్థించిన వాళ్లు కూడా లేకపోలేదు. బ్లాక్ మనీ బయటికొస్తుందంటే, రెండు రోజుల పాటు ఇబ్బంది పడినా పర్వాలేదు అని అభిప్రాయం వ్యక్తంచేశారు మోడీ నిర్ణయాన్ని సమర్థించివాళ్లు.