Gift to Losing Sarpanch ఓడిపోయిన సర్పంచ్ అభ్యర్థికి రూ.11 లక్షల నగదు, కారు, భూమి బహుమతిగా ఇచ్చిన గ్రామస్థులు!

Villagers Gift to Losing Sarpanch పంచాయతీ ఎన్నికల్లో ఒక్క ఓటు తేడాతో ఓటమిపాలైన సర్పంచ్ అభ్యర్థికి జాక్‌పాట్ తగిలింది. గ్రామస్థులంతా కలిసి ఆయనకు రూ. 11 లక్షల నగదుతోపాటు ఓ కారు, కొంత భూమి బహుమతిగా అందజేశారు. అరుదైన ఈ సన్నివేశం హరియాణా పంచాయతీ ఎన్నికల్లో చోటుచేసుకుంది. ఫతేహాబాద్‌లోని నధోడి గ్రామ పంచాయతీకి ఎన్నికలు జరిగాయి. పంచాయతీలో మొత్తం 5,085 మంది ఓటర్లు ఉండగా.. మొత్తం 4,416 ఓట్లు పోలయ్యాయి. ఇందులో సుందర్ అనే అభ్యర్థికి 2,200 ఓట్లు, నరేందర్ అనే మరో అభ్యర్థికి 2,201 ఓట్లు వచ్చాయి. దీంతో నరేందర్ చేతిలో ఒక్క ఓటు తేడాతో సుందర్ ఓడిపోయారు. దీంతో ఓటమి బాధ నుంచి సుందర్‌ను బయటపడేయాలని గ్రామస్థులు నిర్ణయించుకున్నారు. సుందర్‌కు గ్రామస్థులు ఊహించని విధంగా కానుకలు అందించారు. గ్రామ ప్రజలంతా రూ.11,11,000 నగదు, ఓ స్విఫ్ట్ డిజైర్ కారు, అర ఎకరం భూమిని బహుమతిగా అందజేశారు. అంతేకాదు, ఐదేళ్ల తర్వాత జరిగే పంచాయతీ ఎన్నికల్లో సురేందర్‌ను సర్పంచ్‌గా ఎన్నుకుందామని ప్రకటించారు. గ్రామస్థుల నుంచి తనకు దక్కిన గౌరవం సుందర్ సంతోషం వ్యక్తం చేశాడు. గ్రామ ప్రజల ప్రేమను పొందడమే తనకు అతిపెద్ద విజయమని వ్యాఖ్యానించారు.

పంచాయతీ ఎన్నికలంటే కొట్లాటలు, ఘర్షణలు, గొడవలతో గ్రామస్థులు వర్గాలు విడిపోతారు. అలాంటిది సోదరభావంతో అందరూ ఏకతాటిపైకి వచ్చి ఓడిపోయిన అభ్యర్థిని సన్మానించిన గ్రామస్థులను అందరూ అభినందిస్తున్నారు. అలాగే, ఫరీదాబాద్ జిల్లాలోని ఫతేపూర్ తాగా గ్రామానికి కొత్తగా ఎన్నికైన సర్పంచ్‌ను కూడా స్థానికులు ఇలాగే గొప్పగా సన్మానించారు. రూ. 11 లక్షల విలువైన రూ. 500 నోట్లతో గజమాల తయారు చేసి దానితో ఆయనను సన్మానించారు.

రోహ‌త‌క్ జిల్లాలోని చిరి గ్రామంలో ధర్మ‌పాల్ అనే వ్య‌క్తి సర్పంచ్ అభ్య‌ర్థిగా పోటీ చేసి 66 ఓట్ల తేడాతో ఓడిపోగా.. ఆయనకు గ్రామస్థులంతా ఒక ఫంక్ష‌న్ ఏర్పాటు చేశారు. ధ‌ర్మ‌పాల్‌కి త‌ల‌పాగా చుట్టి, మెడ‌లో దండ వేశారు. అంద‌రూ చందాలు వేసి కారు కొనివ్వ‌డ‌మే కాకుండా రూ.2 కోట్ల నగదు కూడా ఇచ్చారు.

Read Latest National News And Telugu News