మేడ్ ఇన్ ఇండియా: రక్షణ రంగానికి బిలియన్ డాలర్లు

రక్షణ రంగానికి ఉపయోగపడే వందల బిలియన్ డాలర్ల విలువైన విదేశీ యుద్ధ విమానాలు, పటిష్ఠమైన వాహనాలు, జలాంతర్గాములు, హెలికాప్టర్ల కొనుగోలు చేయడానికి సిద్ధపడుతోన్న భారత్ వాటిని స్వదేశంలోనే తయారు చేయాలని షరతు విధిస్తోంది. కొత్త రక్షణ రంగ విధానంలో భాగంగా భారతీయ పరిశ్రమలను భాగస్వాములుగా చేసుకుని, విదేశీ ఉత్పత్తతిదార్లను ఆహ్వానిస్తూ ప్రకటన విడుదల చేసింది. గత జులైలో జలాంతర్గాముల బిడ్డింగ్ ప్రక్రియను ప్రారంభించిన రక్షణ శాఖ, ఇలాంటి ఒప్పందాల వల్ల భారత్‌లో ఉద్యోగాల కల్పనతోపాటు సాంకేతికతను అందిపుచ్చుకోవచ్చని భావిస్తోంది.

ఐరోపాకు చెందిన ఎయిర్‌బస్ సంస్థ ఏంజిలింగ్ పాంథర్ హెలికాప్టర్ల అమ్మకానికి ముందుకు వచ్చింది. వందల బిలియన్ డాలర్ల ఈ కాంట్రాక్టు తమకు దక్కితే హెలికాప్టర్లను సరఫరా చేయడానికి కనీసం దశాబ్దం పడుతుందని, బహుళ ప్రయోజన చాపర్స్‌కు భారత్ ప్రపంచస్థాయి కేంద్రంగా మారుతుందని ఏంజిలింగ్ పేర్కొంది. ఈ సువర్ణావకాశాన్ని వదులుకోరాదని విదేశీ సంస్థలు భావిస్తున్నాయి. ఎఫ్-16 యుద్ధ విమానాల కోసం 15 బిలియన్ డాలర్లు వెచ్చించనున్నారు. అలాగే జర్మనీ, ఫ్రాన్స్‌కు చెందిన జలాంతర్గామి నిర్మాణ సంస్థలు 10 బిలియన్ డాలర్ల విలువైన సబ్-మెరైన్ కాంట్రాక్టు దక్కించుకోడానికి పోటీ పడుతున్నాయి.

విదేశీ సంస్థలు ఇండియాలో తమ కార్యకలాపాలు ప్రారంభిస్తే ఆర్థిక వ్యవస్థకు లబ్ది చేకూరుతుంది. సార్వత్రిక ఎన్నికలకు రెండేళ్ల కంటే తక్కువ వ్యవధి ఉండటంతో నిరుద్యోగులను ప్రసన్నం చేసుకోడానికి ప్రధాని నరేంద్రమోదీ పెద్ద సంఖ్యలో ఉద్యోగాల కల్పనపై దృష్టిసారించారు. అయితే 2017 తొలి త్రైమాసికంలో ఉద్యోగితస్థాయి కేవలం 6.1 శాతం వృద్ధి రేటు మాత్రమే నమోదైంది. జులై నుంచి అమల్లోకి వచ్చిన వస్తు సేవల పన్ను ద్వారా లక్షమందికి తక్షణ ఉద్యోగాలు లభిస్తాయని నిపుణులు అంచనా వేశారు. రక్షణ రంగంలో దీర్ఘకాలిక ప్రయోజనాలను ఆశిస్తూ వ్యాపారాలను ప్రోత్సహించడం ద్వారా ఇతర దేశాలను అనుసరించడానికి భారతదేశం ప్రయత్నిస్తోంది.