దినకరన్ వర్గానికి హైకోర్టులో చుక్కెదురు!

దినకరన్‌ వర్గానికి మద్రాసు హైకోర్టు షాక్ ఇచ్చింది. తమిళనాడు అసెంబ్లీలో బలపరీక్ష నిర్వహించాలంటూ టీటీవీ దినకరన్‌ వర్గం దాఖలు చేసిన పిటిషన్‌ను బుధవారం (సెప్టెంబర్ 20) న్యాయస్థానం అత్యవసర విచారణ చేపట్టింది. ఇరు వర్గాల వాదన విన్న తర్వాత.. తదుపరి ఉత్తర్వులు ఇచ్చేంత వరకూ బలపరీక్ష నిర్వహించడానికి వీల్లేదని న్యాయమూర్తి దురైస్వామి ఉత్తర్వులు జారీ చేశారు. ఎమ్మెల్యేల అనర్హతపై కేసు విచారణ పూర్తయ్యేంత వరకు విశ్వాస పరీక్ష నిర్వహించడానికి వీల్లేదంటూ న్యాయస్థానం స్పీకర్‌ను ఆదేశించింది.

మరోవైపు తిరుగుబాటు ఎమ్మెల్యేలపై విధించిన అనర్హత వేటుపై స్టే విధించలేమని హైకోర్టు స్పష్టం చేసింది. కేసు విచారణ పూర్తయ్యేంత వరకూ ఆ 18 మంది అనర్హత ఎమ్మెల్యేల స్థానాల్లో ఎన్నికలు నిర్వహించడానికి వీల్లేదని కోర్టు వెల్లడించింది. ఈ కేసు తదుపరి విచారణను అక్టోబరు 4కు వాయిదా వేసింది.

సీఎం పళనిస్వామి, పన్నీర్‌సెల్వం ఒకటవడాన్ని వ్యతిరేకిస్తూ దినకరన్‌ వర్గానికి చెందిన 18 మంది ఎమ్మెల్యేలు తిరుగుబాటు చేశారు. పళనిస్వామి ప్రభుత్వానికి మద్దతు ఉపసంహరించుకున్నట్లు బహిరంగంగా ప్రకటించారు. దీంతో తిరుగుబాటు ఎమ్మెల్యేలందరిపై స్పీకర్‌ ధన్‌పాల్‌ అనర్హత వేటు వేశారు. తమపై వేసిన అనర్హత వేటును తొలగించాల్సిందిగా ఎమ్మెల్యేలు హైకోర్టులో పిటిషన్‌ను వేశారు.

ముఖ్యమంత్రి పళనిస్వామిపై తమకు నమ్మకం లేదని, ఆయన వెంటనే అసెంబ్లీలో తన బలాన్ని నిరూపించుకోవాలని దినకరన్‌ వర్గం డిమాండ్‌ చేస్తోంది. అసెంబ్లీలో బలపరీక్ష నిర్వహించాలంటూ గవర్నర్ విద్యాసాగర్‌ రావును కోరినా.. ప్రయోజనం లేకపోవడంతో దినకరన్ వర్గం మద్రాసు హైకోర్టును ఆశ్రయించింది. అయితే.. అక్కడ కూడా వారికి ఎదురుదెబ్బ తగిలింది.