జగన్ సర్కారు బాటలో మహారాష్ట్ర కొత్త సర్కారు.. శివసేన ఊహించని రీతిలో..

మహారాష్ట్రలోని శివసేన- ఎన్సీపీ - కాంగ్రెస్ సంకీర్ణం కనీస ఉమ్మడి కార్యచరణ (సీఎంపీ)ను ప్రకటించింది. దీని ప్రకారం హిందూత్వ రాజకీయాలకు ప్రసిద్ధి చెందిన ఉద్ధవ్ థాక్రే.. ఇక నుంచి సెక్యులర్ ప్రభుత్వాన్ని నడపనున్నారు. తొలుత లౌకిక వాద అనే పదాన్ని సీఎంపీలో చేర్చడానికి శివసేన అంగీకరించలేదు. కానీ లౌకికవాదాన్ని తొలి అంశంగా చేర్చడం గమనార్హం. తొలి పేరాలోనే లౌకికవాదం అనే పదాన్ని రెండుసార్లు ఉపయోగించారు.

రైతుల సమస్యలు, నిరుద్యోగం, ఆరోగ్యం, పరిశ్రమలు, సామాజిక న్యాయం, మహిళలు, విద్య, పట్టణాభివృద్ధి, పర్యాటకం, కళలు తదితర అంశాలను సీఎంపీలో ప్రముఖంగా ప్రస్తావించారు.

ఏపీలో జగన్ సర్కారు స్థానికులకే 75 శాతం ఉద్యోగాలివ్వడానికి చట్టం చేసిన సంగతి తెలిసిందే. ఇదే తరహాలో మహారాష్ట్రలో 80 శాతం ఉద్యోగాలను స్థానికులు, భూమి పుత్రులకే కేటాయించాలని ఉద్దవ్ సర్కారు నిర్ణయించింది. ఈ అంశాన్ని కూడా సీఎంపీలో చేర్చారు. ఇందుకు అనుగుణంగా చట్టం తెస్తామని మహా వికాస్ అఘాడీ మాటిచ్చింది.

తక్షణమే రైతు రుణమాఫీ, రూపాయి క్లినిక్‌లు తదితర అంశాలను సీఎంపీలో చేర్చారు. ఎన్నికల సమయంలో శివసేన రూ.10కే భోజనం అందిస్తామని ప్రచారం చేసింది. ఈ అంశాన్ని కూడా కనీస ఉమ్మడి కార్యచరణలో చేర్చారు.