Maharashtra: ముఖ్యమంత్రి షిండే ప్రాణాలకు ముప్పు.. సెక్యూరిటీని పెంచిన అధికారులు

మహారాష్ట్ర (Maharashtra) ముఖ్యమంత్రి ఏక్‌నాథ్ షిండే ప్రాణాలకు ముప్పు ఉందన్న సమాచారంతో అధికారులు ఆయనకు భద్రతను మరింత పెంచారు. శనివారం సాయంత్రం సీఎం షిండే ప్రాణాలకు ముప్పు ఉందని సమాచారం అందిందని రాష్ట్ర ఇంటెలిజెన్స్ డిపార్ట్‌మెంట్‌ (SID) అధికారులు తెలియజేశారు. తమకొచ్చిన నిర్దిష్ట సమాచారం తర్వాత వెంటనే చర్యలు తీసుకున్నామని, ముఖ్యమంత్రికి భద్రతను పెంచామని రాష్ట్ర ఇంటెలిజెన్స్ కమిషనర్ అశుతోష్ డంబ్రే చెప్పారు. ఇప్పటికే సీఎం షిండేకు జెడ్ ప్లస్ కేటగిరి భద్రత ఉంది. ఆయన ప్రాణాలకు ముప్పు ఉందనే సమాచారంతో అదనపు భద్రత కల్పించారు. థానేలోని షిండే ఇంటి దగ్గర, ముంబైలోని అధికారిక నివాసం దగ్గర కూడా భద్రతను పెంచినట్టు అశుతోష్ డంబ్రే చెప్పారు. కాగా సీఎం షిండే దసరా ర్యాలీలో అక్టోబర్ 5న ముంబైలోని MMRDA గ్రౌండ్స్‌లో ప్రసంగించనున్నారు. ఈ నేపథ్యంలో బెదిరింపులు రావడంతో నిఘా వర్గాలు భద్రతను కట్టుదిట్టం చేశాయి.

అయితే తను ఎటువంటి బెదిరింపులకు భయపడనని ముఖ్యమంత్రి ఏక్‌నాథ్ షిండే అన్నారు. భద్రతకు సంబంధించిన విషయాలు అధికారులు చూసుకుంటారని, తాను తన పని చేసుకుంటూ పోతానని ఆయన అన్నారు. అలాగే తనకు రాష్ట్ర హోం శాఖపై పూర్తి నమ్మకం ఉందన్నారు. కాగా షిండే శివసేన ఎమ్మెల్యేలతో తిరుగుబాటు చేశారు. ఉద్ధవ్ థాక్రే నేతృత్వంలోని ప్రభుత్వం కూలిపోవడంతో ఈ ఏడాది జూన్‌లో ఆయన ముఖ్యమంత్రి అయ్యారు. కాగా షిండేకు ఇలాంటి బెదిరింపులు రావడం కొత్తేం కాదు. నక్సలిజం ప్రభావితమైన గడ్చిరోలి జిల్లా పట్టణాభివృద్ధి శాఖ మంత్రిగా, సంరక్షక మంత్రిగా ఉన్నప్పుడు షిండేకు గత అక్టోబర్‌లో నక్సలైట్లు పంపినట్లు అనుమానిస్తున్న బెదిరింపు లేఖ వచ్చింది.