మహారాష్ట్రలో మళ్లీ లాక్‌డౌన్ అంటూ ప్రచారం.. ఉద్ధవ్ స్పందన ఇదీ!

కరోనా కరాళనృత్యం చేస్తున్న మహారాష్ట్రలో మళ్లీ పూర్తిగా లాక్‌డౌన్‌ విధిస్తారంటూ సామాజిక మాధ్యమాల్లో జోరుగా ప్రచారం సాగుతోంది. వచ్చే వారం నుంచి మహారాష్ట్ర ప్రభుత్వం కొత్తగా లాక్‌డౌన్‌ విధించే ఆలోచనలో ఉందంటూ ఊహాగానాలు సాగుతున్నాయి. ఈ వార్తలపై మహారాష్ట్ర ముఖ్యమంత్రి ఉద్ధవ్‌ ఠాక్రే ట్విట్టర్ ద్వారా స్పందించారు. మళ్లీ పూర్తిస్థాయి లాక్‌డౌన్‌పై ఎలాంటి నిర్ణయం తమ ప్రభుత్వం తీసుకోలేదని స్పష్టం చేశారు. కరోనా మహమ్మారి కట్టడికి ప్రభుత్వం జారీచేసిన మార్గదర్శకాలు, నిబంధనలను అందరూ పాటించాలని, జన సమూహాలకు దూరంగా ఉండాలని ఉద్ధవ్ విజ్ఞప్తి చేశారు.

రాష్ట్రంలో అన్ని దుకాణాలు, వాణిజ్య సముదాయాలు మూతపడతాయంటూ పుకార్లు షికార్లు చేస్తున్నాయి. దీంతో ప్రజల్లో గందరగోళంతో పాటు భయాందోళనలు వ్యక్తమవుతున్న నేపథ్యంలో అలాంటి నిర్ణయమేదీ తీసుకోలేదంటూ సీఎం ట్విటర్‌లో స్పష్టంచేశారు. ఇలాంటి అవాస్తవాలు ప్రజల్లో ఆందోళనకు కారణమవుతాయనీ.. నిజానిజాలు తెలుసుకోకుండా పుకార్లను వ్యాపింపజేయవద్దని సీఎం కార్యాలయం సూచించింది. కరోనా వైరస్ తీవ్రత ఇలాగే ఉంటే లాక్‌డౌన్ కొనసాగే అవకాశం ఉంది..కానీ, ప్రభుత్వం సూచనలను ప్రజలు తప్పకుండా పాటించి, తమ సంక్షేమం విషయంలో జాగ్రతలు తీసుకుంటారనే నమ్మకం తనకుందని ఉద్ధవ్ ఆశాభావం వ్యక్తం చేశారు.

దేశంలోనే అత్యధిక కరోనా కేసులు మహారాష్ట్రలో నమోదవుతున్నాయి. ప్రస్తుతం ఆ రాష్ట్రంలో 97,648 పాజిటివ్‌ కేసులు నమోదు కాగా.. 3590మంది ప్రాణాలు కోల్పోయిన విషయం తెలిసిందే. అన్‌లాక్ 1.0లో భాగంగా వ్యాపార కార్యకలాపాలకు మహారాష్ట్ర ప్రభుత్వం అనుమతులు ఇచ్చిన విషయం తెలిసిందే. ప్రభుత్వ కార్యాలయాల్లో 15 శాతం సిబ్బందికి, ప్రయివేట్ సంస్థల్లో 10 శాతం సిబ్బందికి అనుమతించింది.