ఫిలిం స్టూడియోలో భారీ అగ్ని ప్రమాదం

ముంబైలోని ఆర్కే స్టూడియోస్‌లో శనివారం మధ్యాహ్నం భారీ అగ్నిప్రమాదం సంభవించింది. సూప‌ర్ డ్యాన్స్ అనే టీవీ రియాలిటీ షోకి సంబంధించిన షూటింగ్ జ‌రుగుతుండ‌గానే ఉన్నట్టుండి మంట‌లు ఎగసిపడ్డాయి. సెట్టింగ్ డెకరేషన్ కోసం సిద్ధంగా వుంచిన వస్తుసామాగ్రి ఈ అగ్ని ప్రమాదంలో కాలిబూడిదైంది. స్టూడియోలో అగ్ని ప్రమాదం గురించి సమాచారం అందుకున్న ఫైర్ సిబ్బంది ఆరు ఫైర్ ఇంజిన్లతో ఘటనాస్థలికి చేరుకుని అతికష్టంమీద మంటల్ని అదుపులోకి తీసుకువచ్చారు.

ఈ అగ్ని ప్ర‌మాదంపై స్పందించిన ముంబై అగ్నిమాప‌క ద‌ళం ఛీఫ్ పీఎస్ ర‌హ‌న్గ‌డ‌లే.. " మ‌ధ్యాహ్నం 2.22 గంటలకి అగ్ని ప్ర‌మాదం జ‌రిగిన‌ట్టు ఫైర్ కంట్రోల్ రూమ్‌కి కాల్ వచ్చిందని అన్నారు. అదృష్టవశాత్తుగా ఎటువంటి ప్రాణహాని జరగలేదని ఫైర్ సిబ్బంది తెలిపారు.