వీడియో: సీఎం నివాసం ముందు చెట్టెక్కి వ్యక్తి హంగామా!

ముఖ్యమంత్రి నివాసం ముందు చెట్టు ఎక్కి ఓ వ్యక్తి గందరగోళం సృష్టించాడు. బీపీఎల్ పథకం కింద తనకు ఇళ్లు నిర్మించి ఇస్తామని హామీ ఇవ్వకపోతే అక్కడ నుంచి దూకి ఆత్మహత్య చేసుకుంటానని బెదిరించాడు. ఉత్తరప్రదేశ్ రాజధాని లక్నోలో చోటు చేసుకున్న ఈ ఘటన.. అధికారులను ఉరుకులు పరుగులు పెట్టించింది.

లలిత్‌పూర్ జిల్లా బత్లాపూర్‌కు చెందిన రామ్‌రాజ్ అనే వ్యక్తి శుక్రవారం (ఫిబ్రవరి 16) ఉదయం ఉత్తరప్రదేశ్ ముఖ్యమంత్రి యోగి ఆదిత్యనాథ్ నివాసం ముందుకు వచ్చాడు. అక్కడ భద్రతాధికారుల కళ్లుగప్పి ఓ చెట్టు ఎక్కాడు. తనకు ప్రభుత్వ పథకం కింద ఇళ్లు నిర్మించి ఇవ్వకపోతే ఆత్మహత్య చేసుకుంటానని హంగామా చేశాడు.

పోలీసులు ఎంతగా నచ్చజెప్పినా అతడు వినిపించుకోలేదు. అగ్నిమాపక సిబ్బందిని రప్పించి అతణ్ని కిందకి తీసుకువచ్చే ప్రయత్నం చేశారు. చివరికి అధికారుల మాట విని అతడు చెట్టు దిగడంతో వారంతా ఊపిరి పీల్చుకున్నారు. తనకు ఉండటానికి సరైన ఇల్లు లేదని, రూ. 1.5 లక్షల అప్పు కూడా ఉందని రామ్‌రాజ్ అధికారుల వద్ద వాపోయాడు.