ఫుడ్ బాగోలేదన్నాడని, కొట్టి చంపేసిన హోటల్ సిబ్బంది!

హోటల్‌లో ఆహారం బాగోలేకపోతే మనం యజమానికి లేదా మేనేజర్‌కు ఫిర్యాదు చేయడం సాధారణమే. అయితే, ఢిల్లీలోని ఓ యువకుడు అలా ప్రశ్నించడమే తప్పైపోయింది. అతడికి అదే చివరి ఆహారమైంది. వివరాల్లోకి వెళ్తే.. పవన్ (30) అనే వ్యక్తి తూర్పు ఢిల్లీలోని మండావలిలోని కమలా డాబాకు వెళ్లాడు. అయితే, అక్కడ వడ్డించిన ఆహారం నాణ్యంగా లేకపోవడంతో హోటల్ సిబ్బందిని ప్రశ్నించాడు. మేనేజరుకు ఫిర్యాదు చేస్తానన్నాడు.

ఈ సందర్భంగా హోటల్ సిబ్బందికి, పవన్‌కు మధ్య వాగ్వాదం చెలరేగింది. అది కాస్తా చిలికి చిలికి గాలివానలా మారింది. దీంతో ముగ్గురు హోటల్ సిబ్బంది పవన్‌పై దాడి చేశారు. అందులో ఒకరు విరిగిన పెద్ద గరిటె కాడతో అతడిని చితకబాదాడు. పిడిగుద్దులు కురిపించారు. దీంతో పవన్‌కు తీవ్ర రక్తస్రావమైంది.

పవన్‌ను వెంటనే స్థానిక ఆసుపత్రికి తరలించారు. అయితే, అప్పటికే పవన్ చనిపోయాడు. పోలీసులు నిందితులను అరెస్టు చేసి, కేసు నమోదు చేశారు. ఢిల్లీలో చిన్న చిన్న విషయాలకే హత్యలు చేసే ఘటనలు పెరిగాయి. గతేడాది 462 హత్య కేసులు నమోదయ్యాయంటే అక్కడి పరిస్థితులు ఎంత దారుణంగా ఉన్నాయో అర్థం చేసుకోవచ్చు.