పెళ్లైన నెలకే భర్తకు బట్టతల ఉందని తెలియడంతో..

27 ఏళ్ల ఓ యువతి చార్టర్డ్ అకౌంటెంట్‌గా ఉద్యోగం చేస్తోంది. నెల కిందట ఆమె పెద్దలు కుదిర్చిన పెళ్లి సంబంధం చేసుకుంది. ఎన్నో ఆశలతో అత్తారింట్లో అడుగుపెట్టింది. కానీ, వివాహమైన కొన్ని రోజులకే తన భర్తకు బట్టతల ఉందని తెలిసింది. ఆ విషయాన్ని దాచిపెట్టి తన మెడలో తాళి కట్టిన అతడిని నిలదీసింది. ‘అదేమంత పెద్ద విషయం కాదమ్మా.. ఈ రోజుల్లో మగవాళ్లకు బట్టతల సాధారణం’ అని అత్తామామలు ఆమెకు సర్దిచెప్పే ప్రయత్నం చేశారు. కానీ, తన భర్త చేసిన మోసాన్ని ఆమె ఏమాత్రం సహించే పరిస్థితిలో లేదు. వెంటనే పోలీసులను ఆశ్రయించారు. దేశ ఆర్థిక రాజధాని ముంబైలో ఈ ఘటన చోటు చేసుకుంది.

ముంబైలోని మీరా రోడ్డులో నివాసం ఉంటే 29 ఏళ్ల వ్యక్తి నగరంలోని ఓ ప్రైవేట్ కంపెనీలో జాబ్ చేస్తున్నాడు. అతడికి బట్టతల ఉండటంతో కొంత కాలంగా విగ్గు వాడుతున్నాడు. నెల రోజుల కిందట అతడు ఓ యువతిని వివాహం చేసుకున్నాడు. అయితే.. పెళ్లి సంబంధం మాట్లాడే సమయంలో తనకు బట్టతల ఉన్న విషయాన్ని అమ్మాయి కుటుంబసభ్యుల దగ్గర దాచిపెట్టాడు. పెళ్లైన కొన్ని రోజులకే ఈ విషయం భార్యకు తెలిసింది.

తన భర్త అతడికి బట్టతల ఉన్న విషయం దాచిపెట్టి తనను పెళ్లి చేసుకున్నాడని బాధిత మహిళ నయా నగర్ పోలీసులకు ఫిర్యాదు చేశారు. అతడిపై తగిన చర్యలు తీసుకోవాలని కోరారు. భర్తను సమర్థించిన అతడి తల్లిదండ్రులపైనా ఫిర్యాదు చేశారు. పెళ్లి చూపుల సమయంలోనే అతడికి బట్టతల ఉందనే విషయం తెలిస్తే.. ఆ సంబంధాన్ని తిరస్కరించి ఉండేదాన్నని బాధిత మహిళ పోలీసుల వద్ద తన గోడు వెళ్లబోసుకున్నారు. తనను మోసం చేసి పెళ్లి చేసుకొని తన పరువుకు నష్టం కలిగించాడని ఫిర్యాదులో పేర్కొన్నారు.

బాధిత మహిళ ఫిర్యాదు మేరకు పోలీసులు కేసు నమోదు చేశారు. ఐపీసీ సెక్షన్లు 406 (నమ్మక ద్రోహం), 500 (పరువు నష్టం) కింద నిందితుడిపై కేసులు నమోదు చేశారు. అతడిని అదుపులోకి తీసుకొని కస్టడీకి తరలించారు. నిందితుడు యాంటిసిపేటరీ బెయిల్ కోరుతో థానే న్యాయస్థానంలో పిటిషన్ దాఖలు చేశాడు.

Also Read: కరోనా గండం.. క్రెడిట్ కార్డులు ముంచేస్తున్నాయి!

Must Read: టర్కీ భూకంపం: గుండెల్ని పిండేస్తున్న దృశ్యం

Don't Miss: పెళ్లి కోసమే మత మార్పిడి కుదరదు.. హైకోర్టు సంచలనం, జంటకు షాక్!