Mainpuri: రూ.45 రూపాయల చోరీకి... 24 ఏళ్ల పాటు విచారణ.. పైగా విచిత్రమైన శిక్ష

Mainpuri: మన దేశంలో కోర్టులు, విచారణలు గురించి చాలామందికి తెలుసు. ఒక కేసులో విచారణ జరిగి.. దానిపై తీర్పు రావడానికి చాలా ఏళ్లు పడుతుంది. విడాకుల కేసు నుంచి.. హత్య కేసుల వరకు ఇదే తంతు. ఉత్తరప్రదేశ్‌లో ఒక దొంగతనం కేసులో 24 ఏళ్ల తర్వాత ఇచ్చిన తీర్పు దీనికి ఉదాహరణగా నిలిచింది. ఆ తీర్పు వైరల్ అయింది. ఓ వ్య‌క్తి జేబులో నుంచి 45 రూపాయ‌లు కొట్టేసిన దొంగ‌ను ప‌ట్టుకుని 24 ఏళ్లకు కోర్టు జైలు శిక్ష విధించింది. 1998లో మైన్‌పురిలోని ఛపట్టీ ప్రాంతానికి చెందిన వీరేంద్ర బాధమ్ జేబులో నుంచి ఓ వ్యక్తి డబ్బులు కొట్టేశాడు. లైన్‌గంజ్ ప్రాంతంలో ఈ చోరీ జరిగిందని గుర్తించిన వీరేంద్ర.. సమీపంలోని పోలీస్ స్టేషన్‌లో ఫిర్యాదు చేశాడు. దీనిపై దర్యాప్తు చేసిన పోలీసులు ఆ చోరీని ఇటావాలోని భూరా ప్రాంతానికి చెందిన మన్నన్ చేసినట్టు గుర్తించి.. పట్టుకున్నారు. అతను దొంగతనం చేసిన రూ.45లను స్వాధీనం చేసుకుని.. కోర్టు ముందు హాజరు పరిచారు.

మైన్‌పురిలోని సీజేఎం కోర్టు ఆదేశాల‌తో 1998 ఏప్రిల్ 18న మ‌న్న‌న్‌ను జైలుకు పంపించారు. రిమాండ్ ఖైదీగా 81 రోజులు మన్నన్ జైల్లో ఉన్నాడు. తర్వాత బెయిల్‌పై బయటకొచ్చాడు. అప్పటి నుంచి ఆ కేసు విచారణ జరుగుతూనే ఉంది. 24 ఏళ్లు అయిపోయింది. దాంతో మన్నన్ ఈ కేసు నుంచి బయటపడాలనుకుని.. తానే దొంగతనం చేశానని ఒప్పుకున్నారు. గత నెల 28న కోర్టులో తానే చోరీ చేసినట్టు అంగీకరించాడు. దాంతో కోర్టు మన్నన్‌కు నాలుగు రోజుల జైలు శిక్ష విధించింది. శిక్ష ఖరారు చేసిన తర్వాత సీజేఎం అతడిని జైలుకు పంపించారు. నాలుగు రోజుల శిక్ష పూర్తయ్యాక జైలు నుంచి విడుదల కానున్నారు.

Read Also:అర్ధరాత్రి టీచర్ల హల్‌చల్... పెట్రోల్ బాటిల్‌తో వాటర్ ట్యాంక్‌పైకి ఎక్కి... బెదిరింపులు