రుణం కోసం ప్రధానికే లేఖ రాసిన విద్యార్థిని

దిగువ మధ్య తరగతి కుటుంబానికి చెందిన ముస్లిం విద్యార్థిని బీబీ సారాకు ఉన్నత చదువులు చదువుకుని, జీవితంలో ఉన్నత స్థాయికి రావాలని కోరిక. కానీ తన పేదరికమే తన చదువుకి అడ్డంకిగా మారింది. "ఎంబీఏ చదువుకుంటాను.. లోన్ ఇస్తారా ప్లీజ్ అంటూ'' అన్ని బ్యాంకుల చుట్టూ ప్రదక్షిణలు చేసినప్పటికీ ఫలితం లేకపోయింది. దీంతో చివరి ప్రయత్నంగా ప్రధాన మంత్రి కార్యాలయంకే ఓ లేఖ రాశారామె. తన చదువుకి అవసరమైన ఆర్థిక సహాయాన్ని రుణం రూపంలో ఇప్పించాల్సిందిగా పీఎంఓకి రాసిన లేఖలో మోడీని కోరారు.

కర్ణాటకలోని మాండ్య పట్టణానికి చెందిన సారా రాసిన లేఖకి స్పందించిన ప్రధాని నరేంద్ర మోడీ, ఆమెకి రుణం అందించేందుకు తగిన విధంగా సహాయం చేయాల్సిందిగా కర్ణాటక రాష్ట్ర ప్రధాన కార్యదర్శికి ఓ లేఖ రాశారు. మోడీ లేఖతో రంగంలోకి దిగిన కర్ణాటక ప్రభుత్వం సారాకు రుణం పొందేందుకు తగిన ఏర్పాట్లు చేసింది. మోడీ లేఖకి స్పందనగా కర్ణాటక ప్రభుత్వం తీసుకుంటున్న చొరవతో విజయా బ్యాంక్ సారాకు రుణం మంజూరు చేసేందుకు ముందుకొచ్చింది. దీంతో సారాకి రూ.1.5 లక్షల ఎడ్యుకేషన్ లోన్ మంజూరైంది.

సారా తండ్రి అబ్ధుల్ మైసూర్ షూగర్ మిల్లులో ఉద్యోగిగా పనిచేస్తున్నారు. గత 9 నెలలుగా తండ్రి పనిచేస్తున్న మిల్లులో జీతాలు చెల్లించకపోవడంతో ఎంబీఏ చదువుకుంటున్న సారాపై ఆ ఆర్థిక ఇబ్బందులు ప్రభావం చూపించాయి. సారాకు కాలేజ్ ఫీజు కోసం రూ.1 లక్ష, ల్యాప్‌టాప్ కోసం మరో రూ.50,000 అవసరం అయ్యాయి. కూతురికి అవసరమైన ఎడ్యుకేషన్ లోన్ కోసం ఓ జాతీయ బ్యాంకుని ఆశ్రయించారు ఆమె తల్లిదండ్రులు. అయితే, అబ్ధుల్ కుటుంబం ఆర్ధిక పరిస్థితితోపాటు మైసూర్ షుగర్ మిల్లు పరిస్థితులపై పూర్తి అవగాహన వున్న ఆ బ్యాంకు మేనేజర్, వారికి రుణం మంజూరు చేసేందుకు నిరాకరించాడు.

ఆర్థిక ఇబ్బందులతో దిక్కు తోచని పరిస్థితుల్లో వున్న సారాకు అప్పుడే ప్రధాని 'మన్ కీ బాత్' కార్యక్రమం గుర్తుకొచ్చింది. సామాన్యుల ఇబ్బందులు తీర్చినట్టుగా మోడీ వెల్లడించిన సందర్భాలు సైతం ఆమె కళ్ల ముందు కదలాడాయి. సామాన్యుల సమస్యలు పరిష్కరించడానికి ప్రధాని నరేంద్ర మోడీ ముందుకొస్తారనే ఆశతో సారా రాసిన లేఖ నిజంగానే ఆశించిన ఫలితాన్నిచ్చింది. తన చదువు అర్థంతరంగా ఆగిపోకుండా ఆర్థిక సహాయం పొందే వీలు కల్పించింది.

భేటీ బచావో, భేటీ పడావో కార్యక్రమాన్ని క్రమం తప్పకుండా చూస్తానంటున్న సారా... ప్రధానికి కృతజ్ఞతలు తెలిపేందుకు ఆయన్ని కలుసుకోవాలనుకుంటున్నట్టు తెలిపారు.
CLICK HERE TO READ THIS ARTICLE IN KANNADA ALSO:
http://vijaykarnataka.indiatimes.com/district/mandya/pm-modi-responding-the-muslim-womans-letter/articleshow/57729501.cms