ఒక్క మాట కాంగ్రెస్‌ కొంప ముంచిందా?

గుజరాత్‌లో కమలం పార్టీ వరుసగా ఆరోసారి జయకేతనం ఎగరవేసింది. 22 ఏళ్ల పాటు అధికారంలో ఉండటంతో ఈసారి ప్రభుత్వ వ్యతిరేకత కారణంగా అధికారంలోకి వస్తామని కాంగ్రెస్ పార్టీ పెట్టుకున్న ఆశలు అడియాసలు అయ్యాయి. గుజరాత్ ఎన్నికలు మోదీ సర్కారుకు లిట్మస్ టెస్టులా మారాయి. మోదీ ప్రభుత్వం చేపట్టిన నోట్ల రద్దు, జీఎస్టీ లాంటి ఆర్థిక సంస్కరణలపై జనం స్పందన తెలుసుకోవడానికి ఈ ఎన్నికలు ఉపయోగపడ్డాయి. వ్యాపారులు ఎక్కువగా ఉండే గుజరాత్‌లో కాంగ్రెస్ పోటాపోటీగా ప్రచారం నిర్వహించింది.

బీజేపీ 22 ఏళ్లపాటు అధికారంలో ఉండటంతో ప్రజల్లో ఏర్పడే ప్రభుత్వ వ్యతిరేకత, మోదీ గుజరాత్‌ సీఎంగా లేకపోవడం, పాటీదార్ వర్గం మద్దతు, నోట్ల రద్దు, జీఎస్టీ, సోషల్ మీడియాలో బలమైన ప్రచారం.. ఇన్ని అనుకూలతలు ఉన్నా కాంగ్రెస్ పార్టీ గట్టి పోటీ ఇవ్వగలిగిందే కానీ.. విజయ తీరాలకు మాత్రం చేరువ కాలేక పోయింది. రాహుల్ తన శైలిని మార్చుకోని ప్రచారం చేసినా, దేవాలయాలను దర్శించినా ఉపయోగం లేకపోయింది.

పాటీదార్ ఉద్యమ నేత హార్దిక్ పటేల్ మద్దతు ప్రకటించడంతో.. కాంగ్రెస్ ప్రచారంలో దూసుకెళ్లింది. మోదీ కంటే మిన్నగా హార్దిక్ సభలకు జనాలు హాజరయ్యారు. కానీ ఒక్క మాట, ఒకే ఒక్క మాట కాంగ్రెస్ కొంప ముంచింది. ప్రధాని మోదీని నీచుడంటూ కాంగ్రెస్ నేత మణిశంకర్ అయ్యర్ చేసిన వివాదాస్పద వ్యాఖ్యలు ఆ పార్టీని ఇబ్బందుల్లోకి నెట్టాయి.

ఇక్కడే ప్రధాని మోదీ చాణక్యం కనబరిచారు. ఈ ఎన్నికల్లో ఎట్టి పరిస్థితుల్లోనూ పార్టీ గెలవాలనే కృత నిశ్చయంతో ఉన్న మోదీ.. అయ్యర్ మాటల్ని తనకు అనుకూలంగా మలుచుకున్నారు. మణిశంకర్ అయ్యర్ దూషించింది కేవలం తనను మాత్రమే కాదని, గుజరాత్ ప్రజలు మొత్తాన్ని అవమానించడమే అని మోదీ బలంగా ప్రచారం చేశారు. ఈ ఒక్క కారణంతోనే కమలం పార్టీ తిరిగి అధికారంలోకి వచ్చిందని చెప్పలేం గానీ.. మణిశంకర్ వ్యాఖ్యలు హస్తం పార్టీకి చేటు చేయగా.. వాటిని తమకు అనుకూలంగా మలుచుకోవడంలో కమలనాథులు, ముఖ్యంగా మోదీ సక్సెస్ అయ్యారు.