గోవా సీఎంగా మనోహర్ పారికర్

గోవా ముఖ్యమంత్రిగా మళ్లీ మనోహర్ పారికరే నియమితులయ్యారు. ​ ప్రస్తుతం ఆయన కేంద్ర రక్షణ మంత్రిగా ఉన్నారు. సోమవారం ఆయన మోడీని కలిసి కేంద్ర మంత్రి పదవికి రాజీనామా సమర్పించనున్నారు. తాజాగా జరిగిన ఎన్నికల్లో కాంగ్రెస్ 17 స్థానాలు గెలుచుకోగా, బీజేపీ 13 సీట్లను గెలుచుకుంది. మిగతా చిన్న పార్టీలు, స్వతంత్ర అభ్యర్థులు కలిపి 10 స్థానాలు గెలుచుకున్నారు. అయితే వీరిలో 9 మంది బీజేపీకి మద్దతు ఇచ్చేందుకు ముందుకు వచ్చారు. దీంతో బీజేపీ బలం 22 అయ్యింది. సంకీర్ణ ప్రభుత్వాన్ని ఏర్పాటు చేస్తామని, ఆ బలం తమకు ఉందని గవర్నర్ ను కలిశారు పారికర్. గవర్నర్ మృదులా సిన్హా అందుకు అంగీకరించి పారికర్ ను ముఖ్యమంత్రిగా నియమిస్తున్నట్టు ప్రకటించారు. కాగా 15 రోజుల్లోగా పారికర్ ప్రభుత్వం బలనిరూపణ చేసుకోవాలి.

గోవా అసెంబ్లీలో మొత్తం 40 స్థానాలు ఉన్నాయి. ప్రభుత్వం ఏర్పాటు చేయాలంటే దాటాల్సిన మ్యాజిక్ ఫిగర్ 21. బీజేపీ చెప్పిన దాని ప్రకారం 22 మంది ఎమ్మెల్యేల మద్దతు వారికి ఉంది. కాగా మరొక్క స్వతంత్ర ఎమ్మెల్యే మద్దతు కూడా భాజపాకే ఇస్తారని పార్టీ చెబుతోంది. కాకపోతే ఆయన ట్రాఫిక్ లో చిక్కుకుపోవడం వల్ల లేక ఇవ్వలేకపోయారని, సోమవారం అతని లేఖ కూడా గవర్నర్ కు అందుతుందని వారు చెప్పారు. అదే జరిగితే బీజేపీ బలం 23 అవుతుంది. ప్రభుత్వం ఏర్పాటు చేయడానికి ఏ ఢోకా ఉండదు. 17 స్థానాలు గెలుచుకున్న కాంగ్రెస్ చిన్నపార్టీలు, స్వతంత్ర ఎమ్మెల్యేలను తమవైపు తిప్పుకునేందుకు చాలా ప్రయత్నించింది. అయితే వారు కేంద్రంలో అధికారంలో ఉన్న బీజేపీ వైపే మొగ్గు చూపారు.