నేనే సీఎం.. నేడే ప్రమాణం

భారతీయ జనతా పార్టీ గోవాలో అధికారం దిశగా పావులు కదిపి ఆ ప్రయత్నంలో విజయం సాధించింది. దీంతో సీఎంగా మనోహర్‌ పారికర్‌ మంగళవారం సాయంత్రం ప్రమాణస్వీకారం చేయనున్నారు. ఇప్పటికే ఆయన కేంద్ర రక్షణ మంత్రి పదవికి రాజీనామా చేయడం, రాష్ట్రపతి ఆమోదించడం చక చకా జరిగిపోయాయి. దీంతో మనోహర్ పారికర్ ముఖ్యమంత్రి పదవిని చేపట్టడంతో పాటు . . కాంగ్రెసేతర ఎమ్మెల్యేలను కలుపుకుని మ్యాజిక్ ఫిగర్‌ను క్రాస్ చేసిన బీజేపీలో మరో 9 మంది ఎమ్మెల్యేలు మంత్రి పదవులను చేపట్టనున్నారు.

వాస్తవానికి కాంగ్రెస్ కంటే తక్కువ స్థానాలను గెలుపొందిన బీజేపీ.. మహారాష్ట్ర వాదీ గోమంతక్ , గోవా ఫార్వర్డ్ పార్టీలతో పాటు ఇతర చిన్న పార్టీలు, స్వతంత్రుల సాయంతో గోవాలో ప్రభుత్వాన్ని ఏర్పాటు చేస్తోంది. దీంతో కేబినెట్‌లో గోవా ఫార్వర్డ్‌ పార్టీ(జీఎఫ్‌పీ)కి రెండు, మహారాష్ట్రవాదీ గోమంతక్‌ పార్టీ(ఎంజీపీ)కి రెండు మంత్రి పదవులు దక్కనున్నట్లు తెలుస్తోంది.

మరోవైపు పారికర్ రక్షణ మంత్రి పదవికి రాజీనామా చేయడంతో ఆ బాధ్యతలను ఆర్ధిక మంత్రి జైట్లీకి అదనంగా అప్పగించారు. ఇప్పటికే రక్షణ శాఖను డీల్ చేసిన అనుభవం జైట్లీకి ఉండటంతో తిరిగి ఆయనకే రక్షణ శాఖను కేటాయించారు. ప్రధాని సలహా మేరకు రక్షణ శాఖను జైట్లీకి కేటాయించారని రాష్ట్రపతి భవన్‌ ప్రకటనలో పేర్కొంది.