Big Breaking: మావోయిస్టు అగ్రనేత ఆర్కే కన్నుమూత

మావోయిస్టు పార్టీలో భారీ విషాదం నెలకొంది. మావోయిస్టు అగ్రనేత అక్కిరాజు హరగోపాల్ అలియాస్ ఆర్కే కన్నుమూశారు. అనారోగ్యంతో ఆయన మృతి చెందారు. కేంద్ర కమిటీ సభ్యుడిగా ఉన్న ఆర్కే కొద్దికాలంగా అనారోగ్యంతో బాధపడుతున్నట్లు తెలుస్తోంది. దక్షిణ బస్తర్ జిల్లాలోని అటవీ ప్రాంతంలో ఆయన మృతి చెందినట్లు సమాచారం. నాలుగు దశాబ్దాలుగా ఆయన మావోయిస్టు ఉద్యమంలో పనిచేస్తున్నారు. దివంగత ముఖ్యమంత్రి వైఎస్ రాజశేఖర్ రెడ్డి మావోయిస్టులతో చర్చలకు ఆహ్వానించిన సమయంలో ఆయన బయటికొచ్చారు. అనంతరం తిరిగి అడవి బాట పట్టిన ఆర్కే పలుమార్లు జరిగిన ఎన్‌కౌంటర్ల నుంచి త్రుటిలో తప్పించుకున్నారు. అనారోగ్యంతో బాధపడుతూ కన్నుమూసినట్లు తెలుస్తోంది. అయితే ఛత్తీస్‌గఢ్ పోలీసులు ఇంకా ధ్రువీకరించలేదు. బస్తర్ రేంజ్ ఐజీ అందుబాటులో లేరు.

మాజీ ముఖ్యమంత్రి చంద్రబాబుపై అలిపిరి వద్ద జరిగిన బాంబు దాడిలో ప్రధాన సూత్రధారిగా ఆర్కే ఉన్నారు. పలు ప్రధాన దాడుల్లోనూ ఆయన సూత్రధారిగా ఉన్నట్లు పోలీసు రికార్డుల్లో ఉంది. గతంలో పోలీసు శాఖ ఆయనపై రూ.50 లక్షల రివార్డును ప్రకటించింది. ఆయన కుమారుడు మున్నా నాలుగేళ్ల కిందట 2016లో జరిగిన ఎన్‌కౌంటర్‌లో చనిపోయారు. ఆయన భార్య రమాదేవి అలియాస్ శిరీష ప్రస్తుతం ప్రకాశం జిల్లా టంగుటూరు మండలం అలకూరపాడులో నివాసముంటున్నారు. ఆర్కే మృతిపై తమకు ఎలాంటి సమాచారం లేదని.. అవన్నీ పుకార్లుగానే భావిస్తున్నామని ఆయన తోడల్లుడు, విరసం నేత కళ్యాణ రావు తెలిపారు.