మోదీ ఎన్నికల ర్యాలీపై మావోయిస్టుల రెక్కీ!

ఎన్నికలు జరుగుతున్న ఉత్తర్ ప్రదేశ్, పంజాబ్ రాష్ట్రాల్లో నిర్వహించే ప్రచారాల్లో పాల్గొనే ప్రధానమంత్రి మోదీ సహా ఇతర నేతలను మావోయిస్టులు టార్గెట్ చేశారని నిఘా వర్గాలు గుర్తించాయి. మోదీ, హోం మంత్రి రాజ్ నాథ్ సింగ్, బీజేపీ జాతీయ అధ్యక్షుడు అమిత్ షాలే లక్ష్యంగా విధ్వంసం సృష్టించాలని మావోయిస్టు పార్టీ కేంద్ర కమిటీ తన శ్రేణులకు పిలుపునిచ్చినట్లు నిఘా వర్గాలు తెలిపాయి. జనవరి 26 (గణతంత్ర్య దినోత్సం) న నాడు విధ్వంసానికి పాల్పడేందుకు మావోయిస్టులు వ్యూహ రచన చేస్తున్నట్లు తమకు సమాచారం అందిందని ఐబీ వర్గాలు చెప్పాయి.

ప్రధానమంత్రి సహా ఇతర ప్రముఖ నేతలకు భారీ భద్రత ఏర్పాటు చేయాలని, స్పెషల్ ప్రొటెక్షన్ గ్రూప్ (ఎస్పీజీ)ని నిఘా వర్గాలు అప్రమత్తం చేశాయి.

గత ఏడాది మల్కన్ గిరి అడవుల్లో దాదాపు 30మంది నక్సలైట్లను పోలీసులు ఎన్ కౌంటర్ చేసిన నేపథ్యంలో దానికి ప్రతికారం తీర్చుకునేందుకు మావోయిస్టులు పథకం పన్నుతున్నట్లు నిఘా వర్గాలు భావిస్తున్నాయి. గతేడాది జరిగిన మల్కన్ గిరి ఎన్ కౌంటర్ కు ఆంధ్రప్రదేశ్, ఒడిషాల ముఖ్యమంత్రులే బాధ్యత వహించాలని మావోయిస్టులు ఇటీవల ఓ లేఖ విడుదల చేశారు.

‘పంజాబ్, ఉత్తర్ ప్రదేశ్ రాష్ట్రాలలో పీఎం సహా పలువురు నేతలు ప్రచారంలో పాల్గొంటున్నందున భారీ విధ్వంసానికి సిద్ధంగా ఉండాలని మావోయిస్టులకు అగ్రనేతలు ఆదేశాలు జారీ చేశారు. ఈ లక్ష్యం నెరవేర్చేందుకు సమర్ధులైన నక్సలైట్లకు పని అప్పగించాలని పార్టీ సంకేతాలిచ్చింది’ అని నిఘావర్గాలు సమాచారం రాబట్టింది. దీంతో పీఎం సహా ఇతర నేతలకు భారీ భద్రత కల్పించాల్సిందిగా అన్ని భద్రతా దళాలకు సూచించాయి.

ఉగ్రవాద సంస్థలు కూడా పీఎంను హిట్ లిస్టులో చేర్చి..భారీవిధ్వంసం సృష్టించాలని పథకం రచించాయని నిఘా వర్గాలు హెచ్చరించాయి.