ట్యూషన్ ప్రేమ, వేరే అమ్మాయితో పెళ్లి.. బంధం కొనసాగించడానికి ఒప్పుకోలేదని..

ఆమె లా ఫైనలియర్ స్టూడెంట్, అతడేమో లా పాఠాలను బోధించేవాడు. ట్యూషన్ కోసం వెళ్లిన ఆమె అతడితో ప్రేమల పడింది. అతడు కూడా ఆమెను ప్రేమించాడు. ఇద్దరూ పెళ్లి చేసుకోవాలని అనుకున్నారు. కానీ అబ్బాయి ఇంట్లోవాళ్లు అందుకు అంగీకరించలేదు. నాలుగు నెలల క్రితమే అతడికి వేరే అమ్మాయితో పెళ్లయ్యింది. పెళ్లయ్యాక కూడా ప్రియురాలితో అనుబంధం కొనసాగించాలని అతడు భావించాడు. కానీ అందుకు ఆమె నిరాకరించింది. దీంతో కోపోద్రక్తుడైన ప్రియుడు ఆమెపై కత్తితో దాడి చేశాడు. అనంతరం గొంతు కోసుకొని ఆత్మహత్యకు ప్రయత్నించాడు. ఈ ఘటన ఉత్తర ప్రదేశ్‌లోని ఘజియాబాద్‌లో చోటు చేసుకుంది.

రక్తపు మడుగులో పడి ఉన్న ఇద్దర్నీ ముందుగా ఓ ప్రైవేట్ హాస్పిటల్‌కు తరలించారు. పరిస్థితి విషమంగా ఉండటంతో సదరు మహిళను ఢిల్లీలోని ఎయిమ్స్‌కు తరలించారు. ప్రియుడి దాడిలో గాయపడిన యువతి లా చివరి సంవత్సరం చదువుతోందని పోలీసులు తెలిపారు.

లా స్టూడెంట్‌తో మాట్లాడటం కోసం ఆదివారం రాత్రి అతడు వాళ్ల ఇంటికి వెళ్లాడు. మాట్లాడుతుండగానే.. అకస్మాత్తుగా స్క్రూ డ్రైవర్‌తో, కత్తితో అనూహ్యంగా దాడి చేశాడు. బాధితురాలి అరుపులు విన్న ఆమె తల్లి వారున్న గదిలోకి పరిగెత్తింది. కానీ అప్పటికే అతడు తన గొంతు కోసుకున్నాడు. పోలీసులకు సమాచారం అందించిన బాధితురాలి తల్లి వారిని ప్రైవేట్ హాస్పిటల్‌కు తీసుకెళ్లింది.