Kerala: కలచివేస్తున్న ఘటన.. రోడ్డు విస్తరణకు బలైన మూగజీవాలు..!

Kerala: కాలుష్యం, చెట్లు లేకపోవడం వంటి కారణాలతో అనేక పర్యావరణ సమస్యలు ఉత్పన్నం అవుతున్నాయి. అనేక జీవరాశులు నాశనం అవుతున్నాయి. రకరకాల వ్యాధులు పుట్టుకొస్తున్నాయి. ప్రకృతికి ఎంత దూరంగా జరుగుతుంటే.. మానవుల జీవితం అంత సంక్లిష్టం అవుతుంది. అయినా సరే.. వీటిని చాలామంది పెడచెవిని పెడుతున్నారు. పర్యావరణ రక్షణను ఏ మాత్రం పట్టించుకోవడం లేదు. దీనికి అర్థం పట్టే ఓ ఘటన కేరళలో చోటుచేసుకుంది. మలప్పురం జిల్లా తిరురంగడి నగర్‌లోని వీకే పాడి వద్ద జాతీయ రహదారిపై భారీ చెట్టును కూల్చేశారు. దాంతో వేలాది పక్షులు మృత్యువాత పడ్డాయి. 66వ జాతీయ రహదారిని విస్తరించేందుకు రోడ్డు పక్కన చెట్లను నరికేస్తున్నారు. అందులో భాగంగానే గురువారం కూడా భారీ వృక్షాన్ని కూల్చేశారు. దాంతో ఆ చెట్టుపై ఉండే కొన్ని పక్షులు ఎగిరిపోయాయి. కానీ చాలా పక్షులు నేల మీద పడి చనిపోయాయి. ఒక్కసారిగా చెట్టు కూలిపోవడంతో గూడుతోపాటు పక్షులు కూడా చెట్టు కొమ్మలకు చిక్కుకుని చనిపోయాయి.


దీనికిపై సంబంధించిన వీడియో సోషల్ మీడియాలో వైరల్ అయింది. దాంతో చెట్టును నరికిన జేసీబీ డ్రైవర్‌ను అదుపులోకి తీసుకున్నారు. సంబంధిత అధికారుల అనుమతి లేకుండానే చెట్టును నరికివేసినట్లు సమాచారం. అటవీ శాఖ అధికారులు సంబంధిత కాంట్రాక్టర్‌పై కేసు పెట్టారు. మరోవైపు జంతు ప్రేమికులు దీనిపై ఆగ్రహం వ్యక్తం చేస్తున్నారు. చెట్టును నరికే ముందు కనీస జాగ్రత్తలు తీసుకోవాలి కదా అని ప్రశ్నిస్తున్నారు. చెట్టును తొలగించే ముందు పక్షులు అక్కడ నుంచి ఎగిరిపోయేలా చేయాలంటున్నారు. ఇవేవీ చేయకుండా ఒక్కసారిగా చెట్టు కూలిపోవడంతో చాలా పక్షులు నేలపై పడి చనిపోయాయి.

పక్షులు చనిపోవడాన్ని చూసిన చాలామంది నెటిజన్లు సీరియస్ అవుతున్నారు. పక్షులను కాపాడేందుకు ప్రత్యామ్నాయ మార్గాలను చూడకుండా ఇలా చేయడం ఎంత వరకు కరెక్ట్ అని ప్రశ్నిస్తున్నారు. పరిణామాలతో సంబంధం లేకుండా విశాలమైన రోడ్ల కోసం ఇలా చేయడమేమిటని విస్తుపోతున్నారు. ఇక పర్యావరణ సమతుల్యత ఎలా సాధ్యమవుతుందని నిలదీస్తున్నారు. ఇన్ని పక్షులతో నిండిన చెట్టును కూల్చడానికి కఠినమైన మనస్సు ఉండాలని ఆక్షేపిస్తున్నారు.

Read Also:మహిళా ఎమ్మెల్యే పరిస్థితి కూడా ఇంతేనా..? భర్తే అంత పని చేశాడు