డాక్టర్ అనిపించుకోవాలంటే ఈ ఎగ్జామ్ పాస్ అవాల్సిందే!

ఇకపై మెడికల్ స్టూడెంట్స్ డాక్టర్ అని పిలిపించుకోవాలంటే ఐదున్నరేళ్ల మెడికల్ కోర్సుతోపాటు నేషనల్ ఎక్సిట్ టెస్ట్(నెక్స్ట్) తప్పనిసరిగా పాస్ అయితీరాల్సిందేనని తాజాగా కేంద్రం స్పష్టంచేసింది. ఈమేరకు గురువారం కేంద్ర వైద్య ఆరోగ్య శాఖ మెడికల్ కౌన్సిల్ బిల్ 2016కి సవరణలు చేసింది. ఈ నెక్స్ట్ పరీక్షతో దేశంలోని వైద్య విద్యలో ప్రమాణాలు పెంచవచ్చని ఉన్నతాధికారి ఒకరు పేర్కొన్నారు. ప్రస్తుతం పీజీ విద్యార్థుల కోసం నిర్వహిస్తున్న నీట్, హెల్త్ కేర్ సర్వీసెస్ కోసం చేపడుతున్న రిక్రూట్‌మెంట్ టెస్ట్, ఫారెన్ మెడికల్ గ్రాడ్యూయేట్ ఎగ్జామినేషన్లకి ఈ నెక్స్ట్ పరీక్ష ప్రత్యామ్నాయమార్గం కానుందని సదరు అధికారి తెలిపారు.

మెడికల్ కౌన్సిల్ ఇన్‌స్పెక్షన్ల వల్ల కేవలం కాలేజీ ఇన్‌ఫ్రాస్ట్రక్చర్ మాత్రమే తెలుస్తుంది కానీ ఈ నెక్స్ట్ పరీక్ష ఫలితాల వల్ల కాలేజీ విద్యా ప్రమాణాలు ఏంటనేది తెలిసిపోతుంది అని మెడికల్ కాలేజీ ప్రొఫెసర్ ఒకరు అభిప్రాయపడ్డారు. ఇదిలావుంటే, ప్రస్తుతం వున్న విద్యా విధానాన్ని మార్చుతూ కొత్త విధానం తీసుకురావాల్సిన అవసరం మాత్రం ఏముంది అని ప్రశ్నించేవాళ్లూ లేకపోలేదు.