అందాల పోటీల్లో సత్తా చాటిన భారత సుందరి మీనాక్షి చౌదరి

అందాల పోటీల్లో భారత సుందరి మీనాక్షి చౌదరి (21) సత్తా చాటింది. మిస్ గ్రాండ్ ఇంటర్నేషనల్ 2018 పోటీల్లో రన్నరప్‌గా నిలిచింది. ఈ ఘనత సాధించిన తొలి భారతీయురాలిగా గుర్తింపు పొందింది. మయన్మార్‌లో జరిగిన ఈ ప్రతిష్టాత్మక అందాల పోటీలు ఆద్యంతం కన్నుల పండువగా సాగాయి. పరాగ్వేకు చెందిన క్లారా సోసా పోటీల్లో విజేతగా నిలిచింది. మిస్ గ్రాండ్ ఇంటర్నేషనల్ 2017 విజేత మరియా జోస్ లోరా (పెరూ).. క్లారాకు అందాల కిరీటం తొడిగింది.

ఈ పోటీల్లో మీనాక్షి చౌదరి మొదటి రన్నరప్‌గా నిలవగా.. ఇండోనేషియా సుందరి నదియా పుర్వోకో రెండో రన్నరప్‌గా నిలిచింది. నికోలే కోలన్ (ప్యూక్టోరికో), హరుకా ఒడా (జపాన్) వరసగా 3, 4 స్థానాల్లో నిలిచారు.

హర్యాణాకు చెందిన మీనాక్షి చౌదరి ఈ ఏడాది జరిగిన ఎఫ్‌బీబీ కలర్స్ ఫెమినా మిస్ గ్రాండ్ ఇండియాగా ఎంపికై దేశం దృష్టిని ఆకర్షించింది. ఎంజీఐ 2018 అందాల పోటీల్లో ఫైనల్‌కు అర్హత సాధించిన 20 మందిలో నిలిచింది. చివరి వరకూ గట్టి పోటీని ఇచ్చి రెండో స్థానంలో నిలిచింది.


మిస్ గ్రాండ్ ఇంటర్నేషనల్ అందాల పోటీలు ప్రారంభించిన తర్వాత ఈ ఏడాది నిర్వహిస్తున్నవి 6వ ఎడిషన్ పోటీలు కావడం గమనార్హం. ఈ పోటీల్లో భారత్ నుంచి ఓ సుందరి రన్నరప్‌గా నిలవడం ఇదే తొలిసారి. డ్యాన్సులు, పాటలతో పోటీలు ఆద్యంతం అభిమానులను హోరెత్తించాయి.