లక్ష్యం ‘పోలీస్’, ఎత్తేమో సెం.మీ తక్కువ.. ఏం చేశాడంటే!

పోలీసు ఉద్యోగాలకు ఎంపిక కావాలంటే తెలివితేటలు మాత్రమే ఉంటే సరిపోదు. ఎత్తు, దానికి తగిన బరువుతో శారీరక దారుఢ్యం బాగుండాలి. ఒక్క సెంటీ మీటర్ ఎత్తు తగ్గినా ఉద్యోగానికి దూరం కావాల్సిందే. రాత పరీక్షలో అర్హత సాధించి, ఎత్తు తగ్గడం వల్ల ఉద్యోగం కోల్పోవాల్సి వస్తే.. ఆ ఊహే భయంకరం కదూ. ఇలాంటి పరిస్థితే ఉత్తర ప్రదేశ్‌లోకి బులంద్‌షహర్‌కు చెందిన అంకిత్ కుమార్ అనే యువకుడికి ఎదురైంది. దీంతో అతడేం చేశాడంటే..

ఎస్సై ఉద్యోగం కోసం దరఖాస్తు చేసుకున్న అంకిత్ రాత పరీక్షలో అర్హత సాధించాడు. కానీ ఫిజికల్ టెస్టులో క్వాలిఫై కావాలంటే 168 సెం.మీ. ఎత్తుండాలి. అతడేమో సరిగ్గా ఒక్క సెంటీమీటర్ తక్కువ ఎత్తున్నాడు. చిన్నప్పటి నుంచి పోలీస్ జాబ్‌కి ఎంపిక కావాలని ఆశయంగా పెట్టుకున్న అంకిత్ హైట్ పెరగడం కోసం మందులు వాడినా ఫలితం లేకపోయింది.

దీంతో తల మీద హెన్నా ఉంచుకొని మీరట్‌లో జరిగిన ఫిజికల్ టెస్ట్‌కి హాజరయ్యాడు. దాని వల్ల ఆ ఒక్క సెంటీమీటర్ ఎత్తు కలిసొస్తుందనేది అతడి ఆశ. కానీ పోలీసు అధికారులు అతడి తలమీద హెన్నా ఉన్న విషయం గుర్తించారు. హెన్నా తొలగించి ఎత్తు కొలవగా.. ఒక సెం.మీ. తక్కువగా ఉండటంతో కుమార్‌ను అన్హరుడిగా ప్రకటించారు. సెక్షన్ 420 కింద చీటింగ్ కేసు నమోదు చేశారు. ఎత్తు తక్కువగా ఉండటం వల్ల ఎస్సై కావాలన్న కుమార్ కల నెరవేరకపోగా.. తప్పు చేసిందుకు కేసులో ఇరుక్కోవాల్సి వచ్చింది.