కొలీజియం మద్దతు కోరుతూ మీరా కుమార్ లేఖ

ప్రతిపక్షాల కూటమి తరపున రాష్ట్రపతి అభ్యర్థిగా ఎన్నికల బరిలో నిలిచిన లోక్ సభ మాజీ స్పీకర్ మీరా కుమార్ తనని రాష్ట్రపతి అభ్యర్థిగా బలపర్చిన 17 పార్టీల మద్ధతు కోరుతూ ఇవాళ కొలీజియంకి ఓ లేఖ రాశారు. విలువలు, సిద్ధాంతాలే ఆధారంగా రాష్ట్రపతి ఎన్నిక జరగాలని పోరాడుతున్న 17 ప్రధాన పార్టీలు తనని తమ అభ్యర్థిగా ఎంచుకోవడం పట్ల మీరా కుమార్ హర్షం వ్యక్తంచేశారు. రాష్ట్రపతి ఎన్నికను అతి క్లిష్టమైన ప్రక్రియగా అభివర్ణించిమ ఆమె.. ఇంత క్లిష్టమైన ప్రక్రియలోనూ అందరి భాగస్వామ్యం కలిగి వుండటం గొప్ప విషయం అని అన్నారు.

''వలస పాలన నుంచి దేశాన్ని విముక్తి చేసిన స్వాతంత్య్ర సమరంతోపాటు కులానికి వ్యతిరేకంగా జరిగిన పోరాటల్లో ప్రత్యక్షంగానో, పరోక్షంగానో తన వంతు పాత్ర వుండటమనేది తన అదృష్టంగా భావిస్తున్నాను. ఈ రెండు పోరాటాలు తన సెంటిమెంట్స్‌ని, ఆలోచనల్ని, నడవడికని ఎంతో ప్రభావితం చేశాయి. పార్టీలకి అతీతంగా పేరొందిన నాయకులనే ఆదర్శంగా తీసుకుని ప్రజాప్రతినిధిగా ప్రస్థానాన్ని కొనసాగించాను. భిన్నత్వంలో ఏకత్వం కలిగిన మన సమాజంలో విలువల కోసమే పనిచేయాల్సి వచ్చినప్పుడు ప్రతీఒక్కరూ ఒక్కతాటిపైకి రావడం గమనించాను'' అని గత స్మృతులని గుర్తుచేసుకున్నారు మీరా కుమార్.

మన ప్రజాస్వామ్యానికి వెన్నెముకగా నిలిచిన రాజ్యాంగాన్ని కాపాడటమే రాష్ట్రపతి విధి. ఆ ప్రజాస్వామ్య విలువలని కాపాడటం కోసం తనతో సహా ఎందరో నాయకులు ఆ దిశగా కృషి చేశారు. ఎన్నో క్లిష్టమైన సందర్భాల్లో మన రాజ్యాంగమే మనల్ని ముందుకు నడిపించింది. చట్టాల రూపకల్పనలో కీలక పాత్ర పోషించే రాష్ట్రపతి కార్యాలయం స్వార్థపూరిత రాజకీయ ప్రయోజనాలకి వేదిక కాకూడదు అని కొలీజియం సభ్యులకి విజ్ఞప్తి చేశారామె.

కొలీజియంలో గౌరవసభ్యులైన మీకు చరిత్ర సృష్టించే అధికారం కూడా వుంది. జాతి పురోగమనాన్ని మార్చేసే ప్రస్తుత తరుణంలో అందరం ఒక్క తాటిపైకి రావాల్సిన అవసరం వుంది. అందుకోసం తనకి మీ మద్దతు ఎంతో అవసరం అని మీరా కుమార్ కొలీజియం సభ్యులకి రాసిన లేఖలో పేర్కొన్నారు.