బంగాళాఖాతంలో రెండు అల్పపీడనాలు...భారీ వర్షాలు!

బంగాళాఖాతంలో రెండు అల్పపీడనాలు కేంద్రీకృతకావడంతో ఆంధ్రప్రదేశ్‌తోపాటు తమిళనాడు రాష్ట్రాల్లో భారీ వర్షాలు పడే అవకాశం ఉందని చెన్నై వాతావరణ పరిశోధన కేంద్రం అధికారి బాలచంద్రన్ తెలిపారు. గతవారం అండమాన దీవులకు సమీపంలో కేంద్రీకృతమైన అల్పపీడనం ప్రస్తుతం మన్నార్‌ జలసంధికి చేరువగా రావడంతో దక్షిణాది జిల్లాల్లో రెండు రోజులపాటు భారీ వర్షాలు పడతాయని తెలియజేశారు.

ఈ అల్పపీడనం వాయుగుండంగా మారి తమిళనాడు ఆంధ్రప్రదేశ్ మధ్య తీరం దాటే అవకాశముందని తెలిపారు. మాల్దీవుల సమీపంలోనూ మరో అల్పపీడనం కేంద్రీకృతమైందని, ఈ రెండు అల్పపీడనాల ప్రభావంతో రాగల 24 గంటల్లో తమిళనాడు, పుదుచ్చేరిలోను విస్తారంగా వర్షాలు కురుస్తాయని ఆయన పేర్కొన్నారు.

అల్పపీడనం ప్రభావంతో చెన్నైలో ఆకాశం మేఘావృతంగా ఉండి చెదురుమదురు వర్షాలు పడతాయని తెలిపారు. ముఖ్యంగా దక్షిణాది జిల్లాల్లో భారీగా వర్షాలు కురిసే అవకాశముందని బాలచంద్రన్ తెలిపారు. అల్పపీడన ప్రభావంతో కడలూరు, నాగపట్నం జిల్లాల్లో బుధవారం రాత్రి నుంచి గురువారం ఉదయం వరకు భారీ వర్షం కురిసింది.

ఆ సందర్భంగా విరుదాచలం మార్కెటింగ్‌ కమిటీ గొడౌన్స్ బయట ఉంచిన 10 వేల ధాన్యం బస్తాలు వర్షం నీటిలో తడిసిపోయాయి. తొమ్మిది గొడౌన్స్‌ను కొందరు ఆక్రమించుకుని వధాన్యపు బస్తాలను నిల్వచేసుకున్నారు. దీంతో గత వారం రోజులుగా పదివేల ధాన్యం బస్తాలు మార్కెట్‌ కమిటీ వెలుపలి బయలు ప్రదేశంలోనే నిల్వచేశారు. గురువారం కురిసిన వర్షానికి ఆ బస్తాలన్నీ తడిసి ముద్దయ్యాయి.