కేంద్రమంత్రి సుష్మాస్వరాజ్‌కు తప్పిన ప్రమాదం..!

దక్షిణాఫ్రికాలో జరగనున్న బ్రిక్స్‌ దేశాల సమావేశానికి 'ఐఎఫ్‌సి-31' విమానంలో బయలుదేరిన కేంద్ర విదేశాంగశాఖ మంత్రి సుష్మాస్వరాజ్‌కు పెను ప్రమాదం తప్పింది. ఆమె ప్రయాణిస్తున్న విమానం 14 నిమిషాల పాటు ఎయిర్‌ ట్రాఫిక్‌ కంట్రోల్‌ (ఏటీసీ)నుంచి సంబంధాలు తెగిపోవడమే ఇందుకు కారణం. ఆమె ఆదివారం (జూన్ 3) మధ్యాహ్నం 2 గంటల ప్రాంతంలో తిరువనంతపురం నుంచి మారిషస్‌కు ప్రత్యేక విమానంలో బయలుదేరారు.

అయితే మార్గమధ్యలో ఉండగా సాయంత్రం 4.44 గంటలకు విమానానికి రాడార్స్‌ నుంచి సిగ్నల్స్‌ ఆగిపోయాయి. దీంతో అప్రమత్తమైన మారిషస్‌ ఏటీసీ ఒక్కసారిగా ప్రమాద హెచ్చరికను జారీ చేసింది. ఆ తరువాత సరిగ్గా 4.58 నిమిషాలకు ఐఎఫ్‌సి31‌ అందుబాటులోకి వచ్చిందని, మారిషస్‌లో ల్యాండ్ అయినట్లు ఆదేశ ఏటీసీ ప్రకటించింది. దీంతో ఎయిర్‌పోర్ట్ అథారిటీ ఆఫ్ ఇండియా ఊపిరిపీల్చుకుంది. ఐఎఫ్‌సి-31 అక్కడి నుంచి మళ్లీ సౌతాఫ్రికాకు బయలుదేరింది.

అయితే ప్రపంచ ఏటీసీ నిబంధనల ప్రకారం.. సముద్ర మార్గంలో ప్రయాణిస్తున్న ఒక విమానానికి, ఎయిర్ ట్రాఫిక్ కంట్రోల్‌తో సంబంధాలు తెగిపోతే.. దానితో కమ్యూనికేషన్ పునరుద్ధరనకు 30 నిమిషాల వరకు ఎదురు చూస్తుంది. అప్పటికీ ఆ విమానంతో సంబంధాలు పునరుద్ధరణ కాకపోతే ప్లేన్ మిస్ అయినట్లు ప్రకటిస్తుంది. అయితే విమానంలో ప్రయాణిస్తున్న వ్యక్తి వీఐపీ కావడంతో వెంటనే ఐఎన్‌సీఆర్‌ఎఫ్‌ఏను యాక్టివేట్‌ చేశారు.