విహార యాత్రలో ఘోర విషాదం.. 32 మంది మృతి

మహారాష్ట్రలో ఘోర విషాదం చోటుచేసుకుంది. సతారా జిల్లాలోని అంబేనలి ఘాట్‌లో ఓ ప్రైవేటు బస్సు లోయలో పడి 32 మంది చనిపోయారు. వారాంతం కావడంతో కొంకణ్‌ వ్యవసాయ విశ్వవిద్యాలయానికి చెందిన 33 మంది మహాబలేశ్వరం విహార యాత్రకు బయల్దేరారు. బస్సు పొలాద్‌పూర్ చేరగానే అదుపుతప్పి లోయలో పడిపోయింది. ప్రమాదం సమయంలో బస్సులో డ్రైవర్, క్లీనర్‌తో పాటు 35 మంది ఉన్నారు.

ఈ సమాచారం తెలియగానే పోలీసులు, అధికారులు ఘటనా స్థలికి చేరి సహాయక చర్యలు చేపట్టారు. ఉదయం 11.30 గంటల సమయంలో బస్సు పొలాద్‌పూర్ ఘాట్ రోడ్డు మీద మలుపు తిరుగుతుండగా బస్సు ఒక్కసారిగా పక్కకి ఒరిగి లోయలో పడిపోయింది. దాదాపు 200 అడుగుల లోతైన లోయలోకి పడటంతో బస్సు నుజ్జునుజ్జయ్యింది. బస్సు లోయలోకి పడక ముందే ఓ ప్రయాణికుడు బయటకు దూకి ప్రాణాలు కాపాడుకున్నాడు. ప్రమాద సమయానికి ఆ ప్రాంతంలో ఎవరూ లేకపోవడంతో ఆ వ్యక్తే స్థానికులకు సమాచారం ఇచ్చాడు. ఎన్డీఆర్‌ఎఫ్ బలగాలు సైతం ఘటనా స్థలానికి చేరి, సహాయక చర్యలు చేపడుతున్నాయి.